Alfred Tennyson

Alfred Tennyson (Somersby, Lincolnshire, 6 augustus 1809 – Blackdown, Susseks, 6 oktober 1892), ek wol oantsjut as Alfred, Lord Tennyson, wie in Ingelsk dichter. Tennyson wie Poet Laureate (hofdichter) fan it Feriene Keninkryk en is oant no ta noch altyd ien fan de populêrste Ingelske dichters. Hy is yn The Oxford Dictionary of Quotations de twads meast sitearre auteur, nei Shakespeare.

In protte fan syn dichtwurk is basearre op klassike mytologyske temas. In Memoriam A.H.H. waard lykwols skreaun ta oantins fan syn bêste freon Arthur Hallam, in kollega-dichter en meistudint oan it Trinity College dy't ek fersein wie oan de suster fan Tennyson mar bytiids stoar oan in harsenbloeding. Ta syn meast ferneamde gedichten hearre Idylls of the King (1885), in rige epyske gedichten grûnfêste op de leginde fan kening Arthur, Ulysses en Tithonus. It earste wurk waard opdroegen oan prins Albert, de man fan keninginne Fiktoaria. Tennyson hat ek foar teäter skreaun, mar syn stikken waarden gjin súkses.