Slach by Slim Buttes

Slach by Slim Buttes (ûnderdiel fan 'e Grutte Sû-Oarloch fan 1876) It plak fan 'e Slach by Slim Buttes datum: 9 – 10 septimber 1876 plak: benoarden de Black Hills, yn it Grutte Sû Reservaat útkomst: Amerikaanske oerwinning konfliktpartijen Lakota Feriene Steaten befelhawwers Amerikaansk Hynder † Mâl Hynder George Crook Anson Mills Eugene A. Carr sterkte 600-800 2.200 ferliezen 10 deaden ûnbekend tal ferwûnen 23 kriichsfinzenen   3 deaden 27 ferwûnen kaart Lokaasje fan 'e Slach by Slim Buttes yn 'e Amerikaanske steat Súd-Dakota.

De Slach by Slim Buttes (útspr. [slɪm bjuʦ], likernôch: "slim bjûts") wie in lytsskalige fjildslach dy't ûnderdiel útmakke fan 'e Grutte Sû-Oarloch fan 1876. Dit treffen waard op 9 en 10 septimber 1876 útfochten benoarden de Black Hills, yn it noardwestlike part fan 'e hjoeddeiske Amerikaanske steat Súd-Dakota. Hjirby ferwuostge it Amerikaanske Leger ûnder brigadegeneraal George Crook it doarp fan it Lakota-opperhaad Amerikaansk Hynder de Aldere en sloech tagelyk in tsjinoanfal fan it opperhaad Mâl Hynder ôf. De Slach by Slim Buttes wie ien fan in hiele rige strafekspedysjes tsjin 'e Lakota en harren bûnsgenoaten, de Noardlike Sjajinnen, nei't dy yn juny fan datselde jiers yn 'e ferneamde Slach oan de Little Bighorn it Amerikaanske 7e Kavaleryrezjimint in ferpletterjende nederlaach tabrocht hiene.