Amebozoos

Amebozoos Rango fósil: Neoproterozoico - Recente
Chaos carolinensis
Clasificación científica
Reino: Protista Filo: Amoebozoa Lühe, 1913 emend. Cavalier-Smith, 1998
Subgrupos
Conosea ou Conosa Mycetozoa ou Myxomycota (mofos mucosos) Archamoebae Lobosea ou Lobosa Tubulinea Flabellinea Grupos de colocación incerta:      Acanthopodida      Stereomyxida      etc.

Os amebozoos ou Amoebozoa son un importante grupo de protozoos ameboides, nos que se inclúen a maioría dos que se moven por medio de fluxos citoplasmáticos internos, que crean expansións da célula chamadas pseudópodos. Os seus pseudópodos son caracteristicamente de extremos redondeados e con forma de dedo, e denomínanse lobópodos. A maioría dos amebozoos son unicelulares, e son comúns nos solos e hábitats acuáticos, onde poden ser de vida libre ou algúns son simbiontes doutros organismos, ou parasitos. Dentro dos Amoebozoa tamén se inclúen os mofos mucosos, que son formas multinucleadas (ou multicelulares) que producen esporas e xeralmente poden verse a simple vista.

O tamaño dos amebozoos varía moito. Moitas especies miden só 10-20 μm, pero entre eles tamén están moitos dos protozoos máis grandes. A famosa especie Amoeba proteus pode atinxir os 800 μm de lonxitude. As amebas multinucleadas como Chaos e Pelomyxa poden ter varios milímetros de longo, e algúns mofos mucosos poden estenderse por unha superficie de varios m².