Harry Potter

Harry Potter
Logo de Harry Potter.
Título orixinal	Harry Potter
Autor/a	J. K. Rowling
Ilustrador/a	Mary GrandPré, Jim Kay, Kazu Kibuishi, Jonny Duddle e Andrew Davidson
Cuberta	Dolores Avedaño[1] Thomas Taylor, Cliff Wright, Giles Greenfield e Jason Cockcroft
Orixe	Reino Unido
Lingua	Inglés
Colección	Harry Potter
Tema(s)	amizade, Coraxe, adolescencia, autodescubrimento, morte e Magia de Harry Potter
Xénero(s)	Fantasía, drama, ficción xuvenil, misterio, suspense, Bildungsroman
Editorial	Galaxia Bloomsbury
Data de pub.	xaneiro de 2003 - 21 de febreiro de 2008 26 de xuño de 1997 - 21 de xullo de 2007
Formato	Impreso (capa dura) Impreso (capa dura e capa branda), audiolibro, libro electrónico[2]
Páxinas	3696 (en total) 3407 (en total)
Tradución	Marilar Aleixandre [HP1] Eva Almazán [HP2], [HP3] e [HP4] Laura Sáez [HP5] e [HP7] Carlos Acevedo [HP6]
Na rede
[ editar datos en Wikidata ]

Harry Potter é o nome dunha serie de sete novelas de fantasía escritas pola británica J. K. Rowling. Os libros narran a vida dun meigo adolescente, Harry Potter, e dos seus amigos Hermione Granger e Ron Weasley, todos eles alumnos da Escola Hogwarts de Maxia e Feiticería. A trama central do argumento xira arredor da loita de Harry contra Lord Voldemort, un meigo escuro que pretende conseguir a inmortalidade, derrocar o goberno máxico coñecido como Ministerio de Maxia, conquistar o mundo máxico e someter os meigos e os muggles, as persoas non-máxicas.

Dende que o 26 de xuño de 1997 se publicou en inglés a primeira novela, Harry Potter e a pedra filosofal, os libros acadaron unha gran popularidade, eloxios por parte da crítica e un éxito comercial en todo o mundo.^[3] Por outra banda, a serie tamén recibiu críticas polo crecente ton escuro que foi adoptando segundo avanzaba a historia, así como a violencia macabra e gráfica descrita. Ata xullo de 2013, os sete libros que compoñen a saga venderon, no seu conxunto, máis de 450 millóns de copias entre todas as traducións a 67 linguas diferentes,^[4][5] incluíndo traducións do primeiro e segundo volumes ao latín^[6][7] e do primeiro ao grego antigo.^[8] Os catro últimos libros da saga bateron marcas como os libros que se venderon máis rapidamente en toda a historia, co último vendendo case 11 millóns de copias nos Estados Unidos nas primeiras vinte e catro horas.

As versións en lingua inglesa dos libros publicáronas Bloomsbury no Reino Unido, Scholastic Press nos Estados Unidos, Allen & Unwin en Australia e Raincoast Books no Canadá. En España, existen versións dos libros nas diferentes linguas oficiais do estado: a encargada da publicación da versión en galego foi a Editorial Galaxia, en catalán a Editorial Empúries, en éuscaro Elkar e, en todo o territorio, en lingua castelá a Editorial Salamandra.

Os sete libros da serie foron adaptados nunha versión cinematográfica composta por oito filmes producidos por Warner Bros. Pictures e que a agosto de 2015 se converteu na segunda saga cinematográfica con máis recadación en toda a historia. A franquía xerou tamén unha ampla mercadoría, de xeito que a marca Harry Potter teña un valor superior aos 25 mil millóns de dólares.^[9] A editorial Little, Brown publicou tamén o guión dunha obra de teatro titulada Harry Potter and the Cursed Child, baseada nunha historia de Rowling e estreada en Londres o 30 de xullo de 2016 no Palace Theatre.^[10]

A serie aborda moitos xéneros, entre os que se atopan a fantasía, o drama, Bildungsroman (o paso da infancia á madurez) e un xénero denominado "historia da escola británica" que inclúe elementos de misterio, suspense, aventura, terror e romance. Deste xeito, a saga inclúe e explora moitos significados e referencias culturais.^[11] Segundo Rowling, o tema principal é a morte.^[12] Outros temas importantes na serie son o prexuízo, a corrupción e a tolemia.^[13]

O éxito dos libros e filmes propiciou que a franquía Harry Potter continúe a se expandir, con numerosas obras derivadas, unha exhibición itinerante, visitas aos estudios de rodaxe, parques de atraccións temáticos, unha plataforma dixital na que Rowling actualiza a serie con nova información e revelacións e unha pentaloxía cinematográfica procedente dunha das obras complementarias, entre outras cousas.

1. ↑ Dolores Avedaño foi a encargada de realizar a portada para a versión en castelán, mais os seus debuxos usáronse tamén para as versións galegas e hispanoamericanas.
2. ↑ Peter Svensson (27 de marzo de 2012). "Harry Potter breaks e-book lockdown". Yahoo. Consultado o 29 de xullo de 2013. 
3. ↑ Allsobrook, Dr. Marian (18 de xuño de 2003). "Potter's place in the literary canon". BBC News. Consultado o 15 de outubro de 2007. 
4. ↑ Erro na cita: Etiqueta <ref> non válida; non se forneceu texto para as referencias de nome Translations for Harry Potter
5. ↑ TIME (31 de xullo de 2013). "Because It's His Birthday: Harry Potter, By the Numbers". Time. Arquivado dende o orixinal o 01 de agosto de 2013. 
6. ↑ Erro na cita: Etiqueta <ref> non válida; non se forneceu texto para as referencias de nome HP1 en latin
7. ↑ Erro na cita: Etiqueta <ref> non válida; non se forneceu texto para as referencias de nome HP2 en latin
8. ↑ Erro na cita: Etiqueta <ref> non válida; non se forneceu texto para as referencias de nome HP1 en grego antigo
9. ↑ Meyer, Katie (6 de abril de 2016). "Harry Potter's $25 Billion Magic Spell". Time. Arquivado dende o orixinal o 10 de abril de 2016. Consultado o 4 de novembro de 2016. 
10. ↑ Cain, Sian (10 de febreiro de 2016). "New Harry Potter book from JK Rowling coming out in July: the play script". The Guardian. Consultado o 22 de novembro de 2016. 
11. ↑ Erro na cita: Etiqueta <ref> non válida; non se forneceu texto para as referencias de nome meanings
12. ↑ Greig, Geordie (11 de xaneiro de 2006). "'There would be so much to tell her...'". The Daily Telegraph (Londres). Arquivado dende o orixinal o 11 de marzo de 2007. Consultado o 4 de abril de 2007. 
13. ↑ Lizo Mzimba (28 de xullo de 2008). "Interview with Steve Kloves and J.K. Rowling". Quick Quotes Quill. Arquivado dende o orixinal o 09 de maio de 2015. Consultado o 23 de novembro de 2016.