Imaxes xeradas por ordenador

Imaxes xeradas por ordenador
Imaxe xerada e animada por ordenador do logo puzzle da Wikipedia
Información xeral
Outros nomes	CGI, Computer Generated Imagery
Xeración	mediante software de CGI

As imaxes xeradas por ordenador (CGI polas siglas en inglés Computer-generated imagery) son as imaxes e o uso de gráficos por ordenador para crear ou contribuír á xeración de imaxes en arte dixital, medios impresos, videoxogos, simuladores, animación por ordenador e efectos visuais en películas, programas de televisión, curtas, anuncios, vídeos ou videoclips.

As imaxes poden ser dinámicas ou estáticas, e poden ser bidimensionais (2-D), aínda que o termo "CGI" úsase máis habitualmente para referirse aos gráficos de ordenador en 3D utilizados para crear personaxes, escenas e efectos especiais en películas e televisión, que se describe como animación por ordenador ou en inglés CGIA, CGI-A (Computer-generated imagery animation).

A primeira longametraxe que fixo uso de CGI foi a película de 1973 Westworld.^[1] Outras das primeiras películas que incorporaron CGI foron A guerra das galaxias (1977),^[1] Tron (1982),^[1] Golgo 13: The Professional (1983), The Last Starfighter (1984), Young Sherlock Holmes (1985)^[1] e Flight of the Navigator (1986).^[2] O primeiro vídeo musical en utilizar CGI foi o premiado "Money for Nothing" (1985) de Dire Straits, cuxo éxito foi determinante para darlle a visibilidade ao proceso.^[3]

A evolución do CGI levou á aparición da cinematografía virtual na década de 1990, onde a visión da cámara simulada non está restrinxida polas leis da física. A dispoñibilidade do software CGI e o aumento da velocidade dos ordenadores permitiron que artistas individuais e pequenas empresas produzan películas, xogos e obras de arte de calidade profesional desde os seus ordenadores domésticos. 

1. ↑ ^{1,0 1,1 1,2 1,3} Formichella, Lucien. "14 groundbreaking movies that took special effects to new levels". Insider (en inglés). Consultado o 2022-09-02. 
2. ↑ Hearn, Marcus (2005). The Cinema of George Lucas. New York City: Harry N. Abrams, Inc. p. 156. ISBN 0-8109-4968-7.
3. ↑ Shaffer, Claire (2019-03-11). "How The Dire Straits' 'Money for Nothing' Video Helped CGI Go Mainstream". Garage (en inglés). Consultado o 2022-09-02.