Radiohead

Radiohead
Radiohead: Thom Yorke, Jonny Greenwood, Colin Greenwood, Ed O'Brien e Phil Selway
Orixe	Abingdon, Oxfordshire,
Período	1985 – presente
Xénero(s)	rock alternativo,[1][2][3] música electrónica,[4][5] rock experimental,[6] art rock[7][8][9]
Selo(s) discográfico(s)	XL, TBD, Parlophone, Capitol
Membros	Thom Yorke Jonny Greenwood Ed O'Brien Colin Greenwood Phil Selway
Artistas relacionados	Atoms for Peace, 7 Worlds Collide
Na rede
www.radiohead.com

Radiohead é unha banda de rock alternativo procedente de Abingdon, Oxfordshire, Reino Unido formada en 1985. A banda está constituída por Thom Yorke (voces, guitarra rítmica, piano), Jonny Greenwood (guitarra principal, teclados e outros), Ed O'Brien (guitarra, coros), Colin Greenwood (baixo, sintetizador) e Phil Selway (batería, percusión). Con influencias de diversos xéneros, o enfoque experimental ao rock de Radiohead foi recoñecido por promover o son do rock alternativo. Foi aclamada como unha das bandas de rock máis importantes do séxulo XXI.

Tras fichar por EMI en 1991 Radiohead editou o seu primeiro sinxelo, "Creep", en 1992. A canción converteuse nun éxito, e fíxose mundialmente coñecida despois da edición do seu álbum de estrea, Pablo Honey, en 1993. A súa popularidade aumentou no Reino Unido co lanzamento en 1995 do seu segundo traballo, The Bends. O seu terceiro álbum, OK Computer (1997), fixo medrar a súa fama internacional. O disco destaca pola súa complexa produción e por falar sobre a alienación moderna, e adoita a ser aclamado como un fito da época da Xeración X.

Kid A (2000) e Amnesiac (2001) marcaron unha evolución no estilo de Radiohead, ao incorporar elementos da música electrónica, do Krautrock, do post-punk e do jazz. Hail to the Thief, aparecido no 2003, mestura un rock guitarreiro, con elementos electrónicos e letras inspiradas na guerra e foi o seu derradeiro traballo co selo EMI.

Os seus seguintes lanzamentos foron pioneiros en plataformas alternativas de edición como paga o que queiras e BitTorrent. O seu seguinte traballo, In Rainbows, foi editado independentemente no 2007, nun principio como descarga dixital, onde os clientes podían decidir canto desexaban pagar, e posteriormente en formato físico cun grande éxito da crítica e de vendas.

O seu oitavo álbum, The King of Limbs (2011), unha exploración do ritmo, desenvolveuse usando extensamente loops e samplers. A Moon Shaped Pool (2016) conta principalmente con arranxos orquestrais de Jonny Greenwood.

1. ↑ Erlewine, Stephen Thomas. AllMusic, ed. "Radiohead biography". Consultado o 20 de febreiro de 2016. 
2. ↑ Young, Alex (21 de xaneiro de 2016). Consequence of Sound, ed. "Radiohead will tour in 2016". Consultado o 20 de febreiro de 2016. 
3. ↑ Robinson, Will (12 de xaneiro de 2016). Entertainment Weekly, ed. "Sam Smith Hasn't Heard Radiohead's Spectre Theme". Consultado o 20 de febreiro de 2016. 
4. ↑ "Ranked: Radiohead". Under the Radar. Consultado o 8 de maio de 2016. 
5. ↑ Erlewine, Stephen Thomas. AllMusic, ed. "Kid A – Radiohead". Consultado o 8 de setembro de 2011. 
6. ↑ Billboard, ed. (21 de xuño de 2003). "True Love Waits—Christopher O'Riley Plays Radiohead". Consultado o 20 de febreiro de 2016. 
7. ↑ Rolling Stone (ed.). "Radiohead: Biography". Consultado o 20 de xaneiro de 2009. 
8. ↑ Encyclopedia Britannica (ed.). "Radiohead - British rock group". Consultado o 10 de agosto de 2015. 
9. ↑ Lahann, Michael. "All Surprises: Radiohead and the Art of Unconventional Album Releases". The Guardian. Consultado o 8 de maio de 2016.