Aranduka

Aranduka térã kuatiañe'ẽ ha'e peteĩchagua oñeñongatuhápe marandu ojehaívo térã oñemoĩvo ta'anga. Jepivénte aranduka ojejapo heta kuatiaroguégui, ojejoapyjoáva ha orekóva hi'ári kuatia ape oñuvã hag̃ua.^[1] Oiko mboyve aranduka jaikuaaháicha, oĩ va'ekue heta ambueichagua oñeñongatuhápe marandu, ha'eháicha umi apakua térã mba'epe yvyrágui ijapopyre.

Jahecháramo he'iseha ambuéva, aranduka niko oimeraẽ tembiapokue ojehai va'ekue ha naimbykýiva, ikatúva oñemonguatia térã oñemoĩ kombutadórape oñemoñe'ẽ hag̃ua, ha'eháicha umi ebook ndoiporúiva kuatia. Umíva ikatu oñemohenda gua'u ramóva (oreko ñemombe'u añetehápe ndojehúi) ha gua'u'ỹ (omombe'úva tembiasa añeteguáva). Ko'ã mokõi atýpe oĩ heta aty'i ambuéva, ha'eháicha ñe'ẽporãhaipyre mitãme guarã, ohekáva ojapo hag̃ua tembiapo mitãnguéra ikatu omoñe'ẽ ha oguerohory, ñe'ẽryru ha Ñe'ẽryrupavẽ, orekóva ñe'ẽ he'iseha ha mba'e omoarandúva, ha heta ambuéva. Arandukakuéra ikatu jajuhu jahávo bliblioteca téra "arandukarendápe", upépe ikatu jaiporu aranduka jahepyme'ẽ'ỹre térã ikatu jaiporuka jahepyme'ẽ'írõ, avei oĩ ñemuha ovendénteva aranduka.

Aranduka ndaha'éi akóinte oreko va'erã ñemoñe'ẽrã: techapyrã, ikatu oreko mba'e oñemoha'angapyre, ta'anga, ñembosarái térã inandipa ikuatiakuéra ojeiporu hag̃ua ñemoha'anga apópe térã jehaípe, ha'eháicha umi aranduka ojeiporúva ohai hag̃ua peteĩ rapicha rekove ñemombe'u.

Aranduka apo javeguáva oñeha'ãmba oñemokyre'ỹvo ombohovái hag̃ua heta tembiporu pyahu ombohasy'ỹvéva marandu ñemyasãi. Techapyrã, oĩ tenda sa'ivehápe oñevende aranduka oñembokuatiáva ha oñevendeve umi eBooks.^[2] Jepémo, aranduka oñembokuatiáva oñevendeve gueteri umi eBook-gui ha heta umi oguerohoryvéva hese.^[3][4] Google Books he'i amo ary 2010 peve ikatumaha ojeikuaauka amo 130.000.000 aranduka.^[5]

1. ↑ International Encyclopedia of Information and Library Science (2nd edición). London: Routledge. 2003. pp. 41. ISBN 0-415-25901-0. OCLC 50480180. https://www.worldcat.org/oclc/50480180. Consultado el March 21, 2023. 
2. ↑ The Law of Cybercrimes and Their Investigations.. Hoboken: Taylor & Francis. 2011. pp. 161. ISBN 978-1-4398-5832-5. OCLC 908077615. https://www.worldcat.org/oclc/908077615. 
3. ↑ Ang, Carmen (15 October 2021). "Print Has Prevailed: The Staying Power of Physical Books."
4. ↑ Richter, Felix (21 April 2022). "E-Books Still No Match for Printed Books."
5. ↑ "Books of the world, stand up and be counted! All 129,864,880 of you.."