Kurundu

Ñande, yvypóra, jaikove ypy guive ñambojeréva ñane akãme opa umi mba'e ojehúva ñande jerére, ha ñaporandu mba'érepa sapy'ánte ojehu umíva. Sapy'ánte oiko yvyryrýi, ama guasu yvytu ratã reheve ha amandáu, háma katu ho'a ára vera ñande rógare ha oĩ omanóva térã ho'a ñane rymbáre ha ojuka. Ha ndajaikuaáigui mba'érepa ojehu, jakyhyje. Upévare, jarekose peteĩ ikatúva oñangareko ñanderehe ani hag̃uátei ojehu ñandéve mba'eve, ha oimérõ ojehu, ani hag̃uátei ivaieterei. Heta mba'e ojeiporu. Oĩ omosãingóva ijajúrare térã oguerekóva ipyapýre, oĩ omoĩva isapatúpe térã ijaóre, oĩ katu heterevoi oguerekóva. Umívape ja'e kurundu, karai ñe'ẽme amuleto térã talisman. Umívape oĩ he'íva "che avogádo".