Cashtal Phurt ny h-Inshey

She cashtal ayns Purt ny h-Inshey, Mannin, eh Cashtal Phurt ny h-Inshey (Baarle: Peel Castle). Va'n cashtal troggit ec ny Wiggynnee er Ellan Noo Perick ta kianglt rish y valley liorish taagher. Ta'n cashtal ayns shelloo Eiraght Ashoonagh Vannin as t'eh foshlit da keayrtee as turrysee car y touree.

Va'n cashtal troggit ec ny Wiggynnee 'sy 11d eash fo reirey Ree Magnus Coshey-rooisht. Ga dy row thieyn cloaie maynaghoil Celtiagh ny shinney er yn ellan hannah, va ny chied niartagheeyn jeant ass aamaid. Va'n Cleiyagh ny chooid jeh'n vannishter Cheltiagh dy bunneydagh agh va ny boallaghyn caggee troggit ny s'anmey. 'Sy 14oo eash leah, va'n chooid smoo jeh ny boallaghyn as ny tooryn troggit ass claghyn geinnee ruy ynnydagh. Shimmey claghyn geinnee ruy ta ry-gheddyn mygeayrt y voayl. Lurg reirey ny Wiggynnee, hannee yn cashtal er ymmyd liorish yn Agglish er-yn-oyr dy row yn ard-cheeill troggit ayn – aspickys Sodor as Mannin – agh v'eh treiggit 'sy 18oo eash.

Hannee yn cashtal dy ve niartit as va soiagheeyn noa currit rish cho yeianagh as 1860. Ta ny thieyn çheusthie jeh'n chashtal nyn dholtanyn nish, agh ta ny boallaghyn mooie foast slane. Ren toghailtyn eddyr 1982 as 1987 soilshaghey magh ruillick vooar chammah as tholtanyn dhoon aamaid Vagnus Cosheyrooisht. She yn feddyn-magh share na oaie y "Ven Phaganagh" voish y 10oo eash as jesheen wannalagh Loghlynnagh as tashtey cooinaghyn argid ayn voish y vlein 1030 ny dy faggyssagh. She yn cummaltagh smoo ard-ghooagh ayn nish na y Moddey Dhoo.

Ta Cashtal Phurt ny h-Inshey ry-akin er billaghyn £10 ta currit magh ec Reiltys Vannin.^[1]

T'eh currit roish dy nee Cashtal Phurt ny h-Inshey soiaghey Avalon ny skeealyn Arthooragh.^[2][3][4]

1. ↑ "Isle of Man". Ron Wise's Banknoteworld. Er ny hashtey veih yn lhieggan bunneydagh er 2008-10-08. Feddynit magh er 2008-10-30.
2. ↑ "Avalon's Location". www.electricscotland.com.
3. ↑ Lorre Goodrich, Norma. King Arthur (1st Perennial library ln.). Harper & Row. ISBN 9780060971823.
4. ↑ Norma Lorre, Goodrich (1987). Merlin. F. Watts. dg. 2. ISBN 9780531150603.