Jean Baptiste Louis Pierre

Ni Jean Baptiste Louis Pierre (23 Oktubre 1833 – 30 Oktubre1905), ammo pay a kas J. B. Louis Pierre, ket maysa idi a Pranses a botanikonga ammo para kadagiti panagadalna iti Asia.

Nayanak ni Pierre idiay Saint-André, Réunion, ken nagadal idiay Paris sakbay a nagtrabaho kadagiti botanikal a hardin ti Calcutta, India. Pinundarna idi 1864 ti Zoo ti Saigon ken Botanikal a Harhardin, nga inmatonanna aginggana idi 1877, kalpasanna daytoy, nagsubli idiay Paris nga idiay ket nagtaeng iti 63 rue Monge, iti asideg ti Herbario ti Paris. Immalis idi 1883 idiay Charenton, kalpasanna idiay Villeneuve-Saint-Georges, manen idiay (circa 1893) Saint-Mandé, ken kanungpalan iti 18 rue Cuvier iti Paris, a nagtaeng idiay aginggana idi pimmusay.

Nagar-aramid ni Pierre kadagiti adu a sientipiko nga eksplorasion iti tropikal nga Asia. Dagiti pablaakna ket mairaman ti Flore forestière de la Cochinchine (1880–1907), ti maysa nga artikulo iti "Sur les plantes à caoutchouc de l'Indochine" (Revue des cultures coloniales, 1903) ken ti seksion iti Sapotaceae iti Notes botaniques (1890–1891).

Adda dagiti nadumaduma a henero a naipanagan ken ni Pierre kas pammadayawan kaniana: ninaganan ni Heinrich Gustav Adolf Engler (1844–1930) ti Pierreodendron iti pamilia ti Simaroubaceae, ken Pierrina iti pamilia ti Scytopetalaceae; ninaganan ni Auguste Jean Baptiste Chevalier (1873–1956) ti Pierreodendron iti pamilia ti Sapotaceae; ken ninaganan ni Henry Fletcher Hance (1827–1886) ti Pierrea iti pamilia ti Flacourtiaceae. Naidedikado idi 1933 idiay Zoo ti Saigon ken Botanikal a Harhardin ti maysa a busto kas pammadayaw kaniana.