Bewnans Ke yw an diwettha diskudhans a lyenn Kernowek hengovek (henn yw, kyns an Dasserghyans). Yn 2002, Graham Thomas a gavas an dornskrif yn Lyverva Genedhlek Gembra. Nyns yw kowal an dornskrif ma: kyllys yw pymp folenn yn dalleth an gwari, diw y'n pervedh ha pymp y'n diwedh. War-lergh Oliver Padel, y skrifas kynsa vershyon Bywnans Ke a-dro dhe 1500; agan dornskrif ni a via skrifys a-dro dhe 1575.[1]
Y'n kynsa rann a Vywnans Ke, yma Sen Ke (po Keladocus) ow tefendya y fydh kristyon erbynn an Myghtern Tewdar (Teutharus). Sen Ke a dhiank a brison an myghtern hag a wra marthusyon erell.
Hwarvedhyansow an nessa rann yw haval dhe'n re yn Historia Regum Britanniae gans Geoffroi a Venow. An Myghtern Arthur a gemmer omaj gans myghternedh lies bro. Mes an Emperour a Rom a vynn diwedha anserghogeth Vreten Veur. Y'n vresel ow sywya, Moddras a dhemmedh an vyghternes Gwynnever. Dhe Arthur war nuk yn kormeuledhek, bysi yw omladh y noy fals ev.
Bywnans Ke ha Bywnans Meryasek yw an dhew vywnans-sens unnik ow turya y'n yeth kernewek.