Back Bal des Ardents Catalan Bál světlušek Czech Bal des Ardents German Bal des Ardents English Bal des Ardents Spanish Bal des Ardents Basque Bal des ardents French Égők bálja Hungarian Ballo degli Ardenti Italian 燃える人の舞踏会 Japanese
Chorea silvestrium[1] seu chorea sarracenica,[2] Francogallice postea Bal des ardents scil. ballatio ardentium appellata, fuit spectaculum saltatorum personatorum Lutetiae die 28 Ianuarii 1393 actum,[3] Carolo VI rege Franciae et quinque nobilibus participibus. Face a Caroli fratre Ludovico duce Aurelianensi allato, vestimenta arserunt saltatorum, ex quibus quattuor igni sunt interfecti, sed Carolus et alius superstites fuerunt. Spectaculum fidem regi labefactavit, et Parisienses hoc indicium aulae luxuriae habentes minati sunt seditionem contra nobiles potentiores movere. Populus indignabundus regem ac ducem Aurelianensem, a scriptore rerum gestarum etiam conatús regicidii et veneficii accusatum, paenitentiam agere coëgit.
Elizabetha Bavariae, uxor Caroli, saltationem habuit ut secundas asseclae nuptias celebret. Historici credunt eam fortasse fuisse charivarium, saltatoribus partes agentibus hominum ferorum daemonicorum. Saltatio in annalibus monachi S. Dionysii et Ioannis Froissartii descripta est, et depicta a magistro Michaelis Burgundiae et aliis in pluribus chirographis saeculi XV. Etiam fortasse Edgaro Allan Poe argumentum scaenae fabulae Hop-Frog dedit.
- ↑ "Personatorum silvestrium et semiferorum ... choream": Ioannes Serranus, Historia regum Galliae integra (1627) (p. 209 apud Google Books)
- ↑ "Choreas sarracenicas inceperunt": monachus S. Dionysii lib. 13 cap. 16
- ↑ Stilo veteri "mil CCC IIIIxx et XII", scil. 1392: ita Froissart p. 90