Back Notre-Dame-katedraal Afrikaans Seu de Notre-Dame de París AN كاتدرائية نوتردام دو باري Arabic نوتردام دى بارى ARZ নটৰ-ডেমৰ কেথেড্ৰেল Assamese Catedral de Notre-Dame de París AST Paris Notr-Dam kilsəsi Azerbaijani پاریس نوتردام کلیساسی AZB Париждағы Нотр-Дам соборы Bashkir Notre Dame de Paris BAN
Ecclesia Nostrae Dominae Parisiensis[1] (Francogallice Cathédrale Notre-Dame de Paris) est cathedralis archidioecesis Parisiensis Ecclesiae Catholicae Romanae in parte orientali Insulae Civitatis Arrotundimento IV Lutetiae in Francia sita. Inter praecipua architecturae Gothicae opera numeratur et una cum Turri Eiffel et Museo Lupariensi insigne Lutetiae est. Curis episcopi Mauricii de Soliaco coepta est. Primus lapis anno 1163 positus est, si fides in fontibus tardiores ponere licet: Gallia Christiana enim ex auctore saeculo quarto decimo de Mauricio ita refert: "circa id tempus [mense Aprili 1163] prima novae cathedralis fundamenta iecit, cuius primarium lapidem posuit Alexander III ut habet Ioannes canonicus Victorinus."[2] De ecclesia incepta Robertus Antissiodorensis monachus in Chronologia sua anno 1175 his verbis refert: "Hic, inter praeclara opera sua, ecclesiam cui praeerat a fundamentis exstruxit."[3] Similiter Robertus de Torigneio in Chronicis suis sic sub anno 1177 ait:
- Mauricius, episcopus Parisiensis, iam diu est quod multum laborat et proficit in aedificatione ecclesiae praedictae civitatis, cuius caput iam perfectum est, excepto amiori tectorio. Quod opus si perfectum fuerit, non erit opus citra montes cui apte debeat comparari.[4]
Altare ecclesiae "feria quarta Pentecostes" (19 Maii 1182) ab Henrico de Marsiaco, legato pontificali, consecratum est.[5] Ita continuatio Chronicorum Sigeberti Gemblacensis sub anno 1182 de episcopo Mauricio refert:
- Ecclesiam beatissimae Dei genitricis Mariae, in qua ipse residet episcopus, propriis magis sumptibus quam alienis decentissimo et sumptuoso opere renovavit, plateam ante ipsam ecclesiam inter utrumque pontem dilatavit, redempto magno pretio a civibus loco, multis mansionibus prius occupato.[6]
Heraclius patriarcha Hierosolymitanus, Lutetiae ad expeditionem sacram suadendam profectus, die 17 Ianuarii 1185 missam in choro ecclesiae celebravit orationemque ad populum pronuntiavit.[7] Mauricio de Soliaco anno 1196 mortuo ecclesia iam fere confecta est, sed sine tecto. Ille igitur in testamento suo denarios centum "ad tectum novae fabricae ecclesiae faciendum plumbeum" donavit.[8]
- ↑ Confer Victoris Hugo Notre-Dame in Paris (Lipsiae: 1895), vol. 2, p. 102: ante portalium maximum Nostrae-Dominae, ecclesiae cathedralis, in interrete: apud zeno.org; similiter, eodem auctore, "in nomine sanctae ecclesiae Nostrae-Dominae Parisiensis."
- ↑ Gallia Christiana. 3a ed. (Lutetiae, 1715-1865) vol. 7 col. 71; citatur Ioannes de Sancto Victore, Memoriale historiarum.
- ↑ Robertus Antissiodorensis, Chronologia anno 1175 textus
- ↑ Robertus de Torigneio, Chronicon anno 1177 vol. 2 p. 68 Delisle.
- ↑ Galfridus Vosiensis, Chronicon Lemovicense (Recueil des historiens des Gaules et de la France (Lutetiae, 1840-1904) vol. 18 p. 212).
- ↑ Continuatio Chronicorum Sigeberti Gemblacensis anno 1182 [Monumenta Germaniae historica ~ Scriptores vol. 6 p. 421.
- ↑ Rigordus, Gesta Philippi Augusti vol. 1 p. 47 Delaborde.
- ↑ Obituarium Ecclesiae Parisiensis die 11 Septembris pp. 145-146 Guérard.