Back غيوم رونديليه Arabic جيوم رونديليه ARZ Guillaume Rondelet Catalan Guillaume Rondelet Czech Guillaume Rondelet Welsh Guillaume Rondelet German Guillaume Rondelet English Guillaume Rondelet Esperanto Guillaume Rondelet Spanish Guillaume Rondelet French
Gulielmus Rondeletius, vulgo Guillaume Rondelet (Monspessulani die 27 Septembris 1507 natus; mortuus in Réalmont die 30 Iulii 1566) fuit homo Francicus naturae peritus. Multa de piscibus scripsit. Medicus privatus cardinali Francisco Turnonio meruit; cum hoc Romae profectus Petrum Bellonium, Hippolytum Salvianum, Ulyssem Aldrovandum annis 1549 et 1550 incurrit.[1] Professor fuit iam ab anno 1545 apud Universitatem Montispessulani et ab anno 1556 exeunte usque ad mortem cancellarius illius universitatis.
Dum de piscibus inquirebat descriptionem gari a Plinio scriptam perlegit remque imitare conatus est (sed sine fermentatione).[2] Garum quod conficere solebat ad amicos misit. Horum Franciscus Rabelaesus et ipse ut videtur confectionem temptavit garumque renovatum ad Stephanum Doletum misit; e qua commutatione carmina Latina Rabelaesi Doletique evenerunt.[3]
Successor Rondeletii in medicinae cathedram, Laurentius Ioubertus, opus capitale De piscibus marinis Francogallice vertit. Medicorum botanicorum zoologorum saeculo XVI exeunte plures Rondeletii fuerunt discipuli, inter quos Franciscus Rabelaesus, Carolus Clusius, Iacobus Theodorus Tabernaemontanus, Matthias de Lobel, Petrus Pena.
- ↑ Gudger (1934) p. 36, fonte non citato
- ↑ Plinius, Naturalis historia 31.93; De piscibus pp. 141, 212, 219; Planchon (1866) pp. 9-10
- ↑ Stephanus Doletus, Carmina. Lugduni: Gryphius, 1538 (pp. 75-76 apud Google Books)