Gaasperecher Park

Gaasperecher Park

De Park am Juni 2023
Lokalisatioun
Land	Lëtzebuerg
Gemeng	Lëtzebuerg
Plaz	Gaasperech
Koordinaten	49°35'15,25"N, 6°7'38,68"O
Bauhär	Stad Lëtzebuerg (Verwaltung)
Fläch	14,86 ha

De Gaasperecher Park ass e Park am Stater Quartier Gaasperech, op de fréiere Flouere Bei der Kéiwiss an Op dem Wakebierg^[1], deen de 7. Juni 2023 ageweit gouf (ursprénglech war 2020 virgesinn).

E gouf vum Bureau Carlo Mersch entworf^[2] an huet eng Fläch vu 14,86 Hektar^[3]. Zentraalt Element ass d'Drosbech, déi an engem renaturéierte Bett queesch derduerch leeft, a ronderëm där hir Uwänner e Fiichtgebitt ugeluecht gouf, duerch dat een iwwer Brécken a Pontonen trëppele kann. Och e Weier vu 70 Ar ass realiséiert ginn.

Am Park gëtt et ë. a. e Pavillon, eng grouss Spillplaz, Terraine fir Petanque, Foussball, Basketball oder Beachvolleyball ze spillen, eng Hondswiss, eng Picknicksplaz an en Areal mat Fitnessgeschier. Am ganze 4,5 km Weeër fir Foussgänger a Cycliste ginn derduerch, déi de Park mat de Stroosse ronderëm verbannen. E Restaurant an en Aussiichtstuerm gi méi spéit amenagéiert.

Den Amenagement huet 15,99 Milliounen Euro kascht^[4].

D'Preparatiounsaarbechte fir de Park unzeleeën hunn am Mäerz 2020 ugefaangen. Am Laf vum Joer gouf de Weier ausgegruewen. Am Februar 2021 gouf ugefaangen, Traisch a Beem unzeplanzen, an am Mee hunn d'Schräineraarbechten ugefaangen^[5].

De Park ass mam stättesche Bus iwwert d'Halt Francophonie um Boulevard de Kockelscheuer a mam Tram vun der Statioun Lycée Vauban aus accessibel.

1. ↑ geoportail.lu
2. ↑ Quell, wou net anescht uginn: Céline Coubray: "Le vert sera de mise au Ban de Gasperich." paperjam.lu, 1 Septembre 2017.
3. ↑ “Die Bäume in der Stadt – Geschichte, Arten und Pflege”, Service Parcs, Ville de Luxembourg, 2024, S. 98
4. ↑ Nadine Schartz, „Grüne Lunge im grauen Ban“ um Spaweck
5. ↑ Rita Rupert: "Gasperich: 16,6 Hektar Grünanlage im Bau." wort.lu, 10-03-2021.