Regierung Bettel-Schneider

D'Regierung Bettel-Schneider war vum 4. Dezember 2013 bis de 5. Dezember 2018 eng Koalitiounsregierung aus DP, LSAP an déi gréng, déi aus de virgezunnene Chamberwale vum 20. Oktober 2013 zu Lëtzebuerg ervirgaangen ass. Si war baséiert um Koalitiounsaccord^[1] tëscht dësen dräi Parteien, dee vun allen dräi den 3. Dezember 2013 guttgeheescht gouf.^[2] De 4. Dezember 2013 gouf se vereedegt.^[3] Regierungschef war den Xavier Bettel, Vizepremier den Etienne Schneider.

Et war zanter der Regierung Thorn-Vouel-Berg, 1974-1979, déi éischt Regierung ouni eng Bedeelegung vun der CSV. Et war och déi éischt Regierung, un där Déi Gréng bedeelegt sinn.

Wéinst de Faarwe Rout, Blo a Gréng, déi d'Parteie symboliséieren, an aus Analogie zu deenen am Fändel vu Gambia, krut si de Spëtznumm Gambia-Koalitioun.

Si bestoung aus 15 Ministeren an 3 Staatssekretären.

Den 28. Mäerz 2014 huet de Marc Hansen de Staatssekretär André Bauler ersat.^[4]

Den 18. Dezember 2015 huet de Premier Xavier Bettel de Ressort Kultur vun der Maggy Nagel iwwerholl, déi hiert Amt opginn hat, woubäi de Guy Arendt neie Staatssekretär dofir gouf. De Marc Hansen sengersäits gouf vum Staatssekretär zum Minister fir de Logement, amplaz vun der Maggy Nagel, ernannt, souwéi zousätzlech zum Delegéierte Minister fir Educatioun a Fuerschung.^[5]

Den 20. Juni 2018 gouf de Claude Turmes Staatssekretär fir Nohalteg Entwécklung an Ëmwelt amplaz vum Camille Gira, dee stënterlech gestuerwe war.^[6]

1. ↑ Service Information et Presse, Accord de coalition verëffentlecht den 2. Dezember 2013
2. ↑ "Blo, Rout a Gréng: Ganz grouss Zoustëmmung!" RTL.lu - 03.12.2013, 18:18 | Fir d'lescht aktualiséiert: 03.12.2013, 23:01
3. ↑ Zu der Bildung vun der neier Regierung: "La formation du Gouvernement 2013" op gouvernement.lu.
4. ↑ "Wiessel an der Regierung: André Bauler raus, Marc Hansen ran." rtl.lu, 19.03.2014, 15:24:04.
5. ↑ "Regierungsëmbildung: Bettel Kultur, Arendt do Staatssekretär, Hansen Logement." rtl.lu, 16.12.2015, 13:54:56.
6. ↑ "De Claude Turmes gouf als neie Regierungsmember vereedegt." rtl.lu, Update: 20.06.2018, 10:20:30.