Sharpless-Katalog

De Sharpless-Katalog ass eng Lëscht vun 312 HII-Regiounen (Emissiounsniwwelen) mat der Absicht vun enger kompletter Lëscht vun dësen Objeten nërdlech vun der Deklinatioun δ = -27° (hien huet allerdéngs och e puer Niwwelen südlech vun dëser Positioun). Déi éischt Editioun aus dem Joer 1953 (Sh1) hat 142 Objeten, déi zweet a lescht Versioun vun 1959 (Sh2) vum Stewart Sharpless dann 312 Objeten. De Katalog huet och e puer Planetareschen Niwwelen a Supernova-Reschter.^[1]

Am Joer 1953 gouf de Stewart Sharpless Mataarbechter vun der United States Naval Observatory, wou hien HII-Regioune vun der Mëllechstrooss op Basis vun der Duerchmusterung vum Palomar Observatory Sky Survey analyséiert a katalogiséiert huet. Aus dëser Aarbecht eraus huet hie seng Kataloge vun HII-Regiounen an zwou Editioune publizéiert, den éischten nach am selwechte Joer mat 142 Niwwelen.^[2] Déi zweet an och lescht Editioun gouf 1959 publizéiert a hat dann 312 Niwwelen.^[3]

Sharpless-Koordinate vun der éischter Editioun Sh1 hunn op de Stärekataloge vun der Bonner Duerchmusterung oder der Córdoba-Duerchmusterung baséiert. Déi zweet Editioun huet Koordinate vun der Epoch 1900 benotzt.^[1]

Am Sh2 hunn e puer Koordinate vun der südlecher Hemisphär Miessofwäichungen vun iwwer enger Bouminutt.^[1] Dat kann en Opfanne vun de gesichten Objeten däitlech erschwéieren. Dofir gouf e revisionéierte Katalog mam Numm BFS (Blitz, Fich and Stark) erausginn.^[1] Dësen hat 65 nei Objeten, 20 Objete goufen ewechgeholl.^[1] Déi meescht vun den Objeten, déi ewechgeholl goufen, waren entweeder schonn opgehollen Niwwelen oder Iwwerreschter.^[1]

Déi 312 Vermierker am Sharpless-Katalog iwwerlappen sech heiansdo mat den 110 am Messier-Katalog (M), de 7.840 vum New General Catalogue (NGC), dem Caldwell-Katalog (dee selwer nees eng Ënnerauswiel vun anere Katalogen duerstellt) mat 109 Iwwerlappungen wéi och dem RCW-Katalog. Zäitgenëssesch waren d'Kataloge Gum an RCW, obwuel dës haaptsächlech déi südlech Hemisphär ofdeckten.

1. ↑ ^{1,0 1,1 1,2 1,3 1,4 1,5} Galaxy Map - The Gum, RCW, Sharpless and BFS catalogs
2. ↑ Stewart Sharpless, A Catalogue of Emission Nebulae Near the Galactic Plane, Astrophysical Journal, vol. 118, p.362, 1953
3. ↑ Stewart Sharpless, A Catalogue of H II Regions, Astrophysical Journal Supplement, vol. 4, p.257, 1959