Sjtasie Valkeberg

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.


De sjtasie van Valkeberg oet 1853

De sjtasie van Valkeberg ies 'ne sjtasie en e mergele geboew oet 1853. Ze ies geboewd aan 't sjpoor van Mestreech - Aoke door de Mestreech-Aokese sjpoorweegmaatsjappie. De architec waor Jacobus Enschedé. 't Embleem, in de vörm van e raad mèt piele ies bove de ingank in mergel oetgebeeld. In de veur- en achtergevel sjtoon ouch de Mestreechse sjter en de Duutsje adelaer in reliëf. In 1867 woort de sjpoorlien doorverkoch aan de Grand Central Belge. In daen tied klónk bie 't arrivere van d'n trein de Franse naam "Fauquemont". In 1898 ging de lien euver nao 't Nederlands Sjtaatssjpoor. In datzelfde jaor kreeg 't geboew twiè extra vleugele, links en rechs van 't hoofgeboew en 'n vestibule, alles in dezelfde historiserende sjtiel.

De sjtiel ies eclectisch, mèt 'n accent op neogotisch, zoa-es de trapgevel en de teurentsjes mèt kantele. Es veurbeeld haet 't paleis van keuning Willem II in Tilburg gedeend, dae op dat moment groathertog waor van 't hertogdom Limburg.

De sjtasie ies de oudste van Nederland en huèrt bie de top 100 Nederlandse Unesco-monumente.


From Wikipedia, the free encyclopedia · View on Wikipedia

Developed by Nelliwinne