Frontera verta

Quest articol chì l'è scrivud in lombard, con la Noeuva Ortografia Lombarda

Per frontera verta se intend una frontera che ghe permet a la sgent, e despess anca a la mercanzia, de spostàss liberament de entità politega a entità politega, senza che ghe sia un gran controll de la frontera.

La frontera verta a l'è la normalità in di frontere interne de un Stat, anca se gh'è di ecezzion: per esempi in China a gh'è una frontera in tra la China continental e i do Region Ministrative Speciai de Hong Kong e Macao e in di Stat Unid gh'è de passà la dovana se se va a Guam, in di Samoa Americane, in di Isole Marianne de Sora e in di Isole Minor de Foeura. Despess i federazzion gh'hann di norme che permeten, in cas ecezzionai, de meter el controll a la frontera: un esempi a l'è l'Australia, che i haveva mitud per el COVID-19.

In di frontere internazzionai inn despess fioeule de acord in tra i Stat, che garantissen la libertà de moeuves e despess anca de viver e lavorà in di vari Stat: l'esempi pussee cognossud a l'è l'Area Schengen in Europa, che l'ha ispirad alter proget compagn del Mercad Uneg del CARICOM, el Concili de Cooperazzion del Golf e la Comunità de l'Africa de l'Est. Stat che inn propi ligad in tra de lor gh'hann acord compagn, per esempi la Noeuva Zelanda e l'Australia gh'hann el Trans-Tasman Travel Arrangement, Regn Unid e Irlanda la Common Travel Area e Russia e Bielorussia gh'hann el Stat de l'Union.