Vinanihefak' i Nily

Ny Vinanihefak' i Neily na Vinanihefak' i Nily na Vinanin' i Neily na Vinanin' i Nily dia faritr' i Ejipta izay ivarinan' ny ony Nily (na Neily) mankany amin' ny Ranomasina Mediteranea. Faritra behonahona izay efa nanan-karena zava-maniry sy biby hatramin' ny Andro Taloha. Efa ho 5 000 taona lasa izay, faritra fambolena ny Vinanihefak' i Nily. Ny ankamaroan' ny taratasy papiro ejiptiana dia avy amin' ity faritra ity. Ankehitriny dia misy mponina 55 000 000 any ho any ny ao.

Antsoina hoe دلتا النيل‎ / Delta an-Nīl na الدلتا, ad-Delta izy amin' ny teny arabo.

Any avaratr' i Ejipta no misy ny Vinanihefak' i Nily ary manomboka ao avaratry ny tanànan' i Kairo (na Kahira), 150 km eo ho eo miala ny morontsirak' i Mediteranea, eo amin' ny toerana antsoin' ny Ejipsiana hoe Batn el-Baqara ("Kibon' ny Omby"). I Nily, aorian' ny fikorianana efa ho 6 600 km, dia misampana maro. Ny velarany dia manodidina ny 24 000 km², izay mahatonga azy ho voalohany amn' ny vinanihefaka ao amin' ny Ranomasina Mediteranea, alohan' ny Vinanihefak' i Rhône .

Toerana stratejika ho an' ny fambolena ny Vinanihefak' i Nily, izay efa nanaovana fitantanan-drano hatramin' ny Andro Taloha, hisorohana ny tondra-drano be loatra sy hamerana ny loza ateraky ny fidiran' ny sira, amin'ny alàlan' ny tany nohadina fandraisana ny rano izay nantsoin' ny Ejipsiana fahiny hoe Hod.