Kaba adolah genre sastra tradisional Minangkabau nan barupo prosa. Kaba dapat dibacokan maupun didendangkan. Bantuaknyo barupo pantun lapeh maupun pantun bakait disaratoi ungkapan pepatah-petitih, mamangan, pameo, kiasan, jo sabagainyo. Kaba bafungsi untuak manyampaikan carito atau amanat. Biasonyo tokoh dalam kaba indak jaleh dan namo-namonyo candaruang basifek simbolik. Sacaro etimologis dapek dihubuangkan jo kato akhbar atau khabar dalam bahaso Arab bararti berita, pasan, atau warta. Diucapkan dalam bahaso Indonesia jo kabar, kamudian barubah manjadi kaba dalam bahaso Minangkabau.
Di dalam tradisi urang Minangkabau kaba iolah sajinih sastra lisan. Mancaritoan suatu kajadian nan ado kaik-an nyo jo caro iduik urang Minangkabau. Dari bantuaknyo kaba digolongan ka dalam prosa liris nan dibaco jo gaya badendang atau dilaguan, tapi acok pulo dalam bantuak pantun. Kaba barisi carito-carito Minangkabau pado mulonyo disampaian sacaro lisan, dalam pakambangannyo alah ditulih dalam bantuak buku. Kaba mampunyoi duo syarat yaitu: partamo, mancaritoan suatu kajadian jo nan kaduo mampunyoi peminat kaba. Manko co itu kaba ndak bisa lapeh dari, kaduonyo mambantuak suatu kasatuan.[1]
- ↑ Abidin, Masoed (2005). Ensiklopedi Minangkabau. Padang: Pusat Pengkajian Islam dan Minangkabau. pp. 208.