Sala Lauak adolah makanan tradisional atau jajanan pasa nan populer di ranah Minangkabau atau Sumatera Barat nan asanyo dari Pariaman. Sala dapek ditamukan di pasa tradisional ataupun restoran lapak nan alah modern namun pado umumnyo sala banyak di jua padagang kaki limo. Sala lauak sangaiklah populer di daerah rantau pado ranah minangkabau, karano pado dasarnyo makanan iko indak dapek lapeh dari pasisia ataulah lauik.
Sacaro harfiah, kato sala dapek diartian sabagai 'goreang', nan artinyo digunoan untuak babagai makanan nan diolah jo caro digoreang,mangkonyo sala lauak ko dapek pulo di hidangan lain nan ado sabuikan sala samacam nasi sala, sala udang, dan sala kapitiang. Adopun lauak sacaro sederhana artinyo ikan.[1]
Sala lauak nan paliang umum adolah nan babantuak bulek sagadang bola pingpong. Sala babantuak bulek iko tabuek dari lauak asin nan di aluihkan jo dicampua basamo adonan tapuang bareh nan dibumbui bawang putiah. Sala jenis ikopunyo tekstur bagian lua nan agak kareh dan bagian dalamnyo nan labiah lunak.[1]