Back Tropiese sikloon Afrikaans Tropischer Wirbelsturm ALS Ciclón tropical AN उष्णकटिबंधी चक्रबात ANP إعصار استوائي Arabic Ciclón tropical AST Tropik siklon Azerbaijani تروپیک سیکلون AZB Тропик циклон Bashkir Tropischa Wiabeschtuam BAR
Ciclone tropical ye ua grande perturbaçon na atmosfera terrestre. Ye un sistema formado por grandes tempestades i ye caratelizada por ser ua region adonde la presson atmosférica ye seneficatibamente menor i la temperatura ye ligeiramente maior de l que sues bizinhanças. Ye ua ária de baixa presson atmosférica cun ua circulaçon cerrada de bentos i defrencia-se de ls ciclones stratropicales por tener un núcleo caliente i un centro bastante defenido an sistemas mais antensos, coincido cumo uolho. La grande defrença de presson atmosférica antre l centro de l ciclone i sues bizinhanças, coincida cumo fuorça de gradiente de presson, gera antensos bentos que puoden ultrapassar 300 Km/h an grandes ciclones. Sou giro caratelístico, ne l sentido anti-horairo ne l'heimisfério norte i horairo ne l'heimisfério sul, ye einicialmente causado pula fuorça de Coriolis i postergada pula einergie liberada pula cundensaçon de la umidade atmosférica. Troboadas i chubas torrenciales stan frequentemente associados a ciclones tropicales. Forman-se questumeiramente nas regiones trópicas, als alredores de la Linha de l Eiquador, adonde custitui ua parte de l sistema de circulaçon atmosférica al mober calor de la region eiquatorial pa las latitudes mais altas. L ciclone tropical ye mobido pula einergie térmica liberada quando aire úmido sobe para camadas mais altas de l'atmosfera i l oupor d'auga associado se cundensa.
Ciclone tropical ye un termo giral para esse fenómeno meteorológico, mas dependendo de sue localizaçon geográfica i de sue antensidade, ls ciclones tropicales puoden ganhar bárias outras chamaçones, tales cumo furacon, tufon, tempestade tropical, tempestade ciclónica, depresson tropical ó simplesmente ciclone.
Porduzen bentos i chubas cumo qualquiera outra region adonde hai seneficatibas taxas de bariaçon de la presson atmosférica. Antretanto, las taxas de bariaçon de la presson atmosférica an ciclones tropicales son an giral mui acentuadas, i associadas a la persença de calor i umidade an abundáncia subre ls ouceanos calientes, las chubas i bentos puoden ser particularmente antensos. Ls ciclones tropicales tamien son capazes de gerar óndias fortíssemas i la maré de tempestade, ua eilebaçon de l nible de l mar tamien causado puls bentos antensos quando l sistema se aprossima dua region costeira. Estes fatores secundairos puoden ser tan debastadores quanto ls bentos i las chubas fuortes. Ls ciclones tropicales forman-se a partir de perturbaçones atmosféricas subre grandes massas d'auga caliente, adonde hai alta cuncentraçon de calor i umidade que funcionan cumo sou cumbustible. Inda assi, perden sue antensidade assi qu'alcançan regiones costeiras i l cuntinente, pus la calor i l'umidade yá nun stan mais çponibles. Esta ye la rezon de las regiones costeiras séren giralmente las árias mais afetadas pula passaige dun ciclone tropical; regiones afastadas de la cuosta son giralmente poupadas de ls bentos mais fuortes. Antretanto, las chubas torrenciales puoden causar anchentes seberas i las marés de tempestade puoden causar eimensas inundaçones costeiras; an alguas ocasiones l'auga de l mar puode chegar la mais de 40 quilómetros de la cuosta. Sous eifeitos puoden ser debastadores pa la populaçon houmana, ambora puodan amenizar stiaiges.
Muitos ciclones tropicales forman-se quando las cundiçones atmosféricas an torno dua perturbaçon fraca na atmosfera son faborables. Esta ye la maneira mais quemun pa la formaçon dun sistema, mas eisisten outros meios menos quemuns pa la formaçon dun ciclone tropical: un ciclone stratropical puode star subre augas suficientemente calientes i eimerso nua region cun alta çponibelidade de calor i umidade, tenendo todas las cundiçones para se trasformar nun ciclone tropical. Este fui l causo de l furacon Catarina an 2004, qu'atingiu la cuosta de la region sul de l Brasil cumo un ciclone tropical cun bentos d'até 185 Km/h.
Ls ciclones tropicales son ls causadores d'alguns de ls piores zastres naturales de l mundo. An 2008, l ciclone Nargis causou mais de 150 000 fatalidades an Mianmar. L ciclone de Bhola de 1970 causou mais de 300 000 muortes an Bangladesh. Alguas regiones de l mundo stan mais propensas la séren atingidas por ciclones tropicales de l qu'outras: l leste de la China questuma ser atingida por dieç ciclones por anho, anquanto que nas Filipinas este númaro puode chegar la binte. Japon, Oustrália, Madagascar, ls países de l Caribe, México i ls Stados Ounidos tamien son atingidos por ciclones to anho, mas an giral esses países stan mais preparados pa l'eibentual chegada dun ciclone tropical: ls Stados Ounidos, por eisemplo, ténen ua agéncia special pa la prebison i monitoramiento de ciclones, l Centro Nacional de Furacones. Antretanto, outros países son menos propensos ó nunca recíben an sues cuostas un ciclone tropical. Ls países banhados pul Mar Arábico i l Golfo de Bengala puoden ser afetados por ciclones tropicales de grande antensidade ua beç an cinco anhos, anquanto que l Atlántico Sul, adonde las augas son demasiadamente fries para suportar ciclones tropicales, la geraçon desses sistemas ténen quedado mais quemun.