Streilha

Ua streilha ye un cuorpo celhestre lhuminoso formado de plasma. Por causa de sue presson anterna, produç einergie por fuson nuclear, transformando moléculas de hidrogénio an hélio. La einergie gerada ye eimitida por meio de l spácio sob la forma de radiaçon eiletromagnética (luç), neutrinos i bento stelar. La streilha mais próssima de la Tierra — depuis de l Sol, la percipal respunsable por sue eiluminaçon — ye Próssima Centauri, que queda a 40 trilhones de quilómetros, ó 4,2 anhos-luç.

La einergie eimitida por ua streilha stá associada la sue presson anterna, que possiblita un ambiente adequado a la fuson nuclear, que produç einergie transformando moléculas de hidrogénio an hélio. Ua streilha ten de tener ua massa arriba dun detreminado balor crítico (cerca de 81 bezes la massa de Júpiter) para que la presson anterior seia suficiente para ocorríren reaçones nucleares de fuson ne l sou anterior. Cuorpos que nun atinge esse lhemite, mas que inda assi eirradian einergie por cumpresson grabitacional cháman-se nanas castanhas (ó nana marron) i son un tipo de cuorpo celhestre na frunteira antre las streilhas i ls planetas, cumo gigantes gasosos. L lhemite superior de massa possible para ua streilha depende de l lhemite de Eddington.

A maior fraçon de l eilemientos mais pesados que l hidrogénio ó hélio ne l ouniberso cumo l fierro, níquel ó outros metales fúrun gerados a partir de la fuson termonuclear ne ls núcleos stelares. Eilemientos cada beç mais pesados gerados ne ls núcleos cula scasseç de eilemientos lhebes téne menor eficiéncia einergética a partir de sue fuson — un ciclo de transiçones de eilemientos que eibentualmente lhieba a la muorte de la streilha. Ua streilha an sou fin puode tener dibersos çtinos dependendo de sues caratelísticas, cumo dar ourige a ua gigantesca spluson, las supernuobas, antrar an colapso dando ourige a un buraco negro ó oureginar ua nana branca.

Las streilhas menores que l Sol ténen menor temperatura i sou brilho ye alaranjado ó abermelhado. Las cumo l Sol ténen temperatura média i l sou brilho ye amarelhado. I las maiores ténen maior temperatura i un brilho branco-azulado.

Las streilhas besibles aparécen cumo puntos brilhantes i cintilantes (por causa de çtorçon ótica causada pula atmosfera) ne l cielo noturno, a la eiceçon de l Sol que debido la sue prossimidade ye bisto cumo un disco i ye l respunsable pula luç de l die. L uso quemun de la palabra streilha nin siempre reflete l berdadeiro oubjeto astronómico: todos ls puntos cintilantes ne l cielo son frequentemente chamados de streilhas, anque poder séren planetas besibles, meteoros (streilha cadente), galáxias, nebulosas, cometas ó até mesmo un sistema binário formado por dues streilhas, cumo ye l causo de Alpha Crux, que custitui la punta mais brilhante de l Cruzeiro de l Sul (ó Crux).