Bactriten (Bactritoidea) sünd en Grupp mank de Koppfööt, de al utstorven is. Leevt hefft se vun 't Ordovizium bit hen to'n Perm. Bi de Bactriten hannelt sik dat um en Paraphyleetsche Grupp, vunwegen, datt se de Stammform vun de Dintenfische un de Ammoniten sünd. De Ammoniten sünd ok al utstorven.
De Bactriten hefft as Butenskelett en lang „Huus“ mit Kamern harrt, un de Sipho weer ganz an'n Rand unnerbrocht, just so, as bi de frögen Nautiloideen (Orthoceraten). Mit de Kamern in dat Huus hefft se ok ehre Updrift mit regelt. Wohrschienlich stammt se vun de lüttjeren Nautiloideen, as Bactroceras ut dat Ordovizium af. Unner Umstänn is Eobactrites de ollste Aart. Se stammt ut dat deepste Ordovizium in Böhmen. De Döörsnitt dör dat Huus weer kreisrund. De Sipho hett noch nich ganz an'n Rand seten.