Bernd Michael Lade

Bernd Michael Lade (* 24. Dezember 1964 in Berlin) is en düütschen Schauspeler un Speelbaas.

Lade is in de DDR opwassen, woneem he toeerst en Utbillen as Bofacharbeiter maakt hett. Man dorna hett he en Studium an de Ernst-Busch-Schauspeelschool in Berlin afleggt. Gliek dorna harr he sien eerst Engagement in Frankfort an de Oder un weer ok in Feernsehfilmen vun’t DDR-Feernsehen to sehn.

In de Johren vör 1989 hett Lade sik to de Punk-Szeen vun Oostberlin tellt. He weer Slagtüüchspeler in de Musikgrupp planlos, wat een vun de eersten Punkgruppen in de DDR wesen is (Nicht to verwesseln mit de Grupp Planlos, de ut Grevenbroich kummt). Twüschen 1985 un 1990 weer he Singer bi de Aventgarde-Grupp Cadavre Exquis.

Na de freedlich Revolutschoon un de dormit verbunnen politisch Ännern füng Lade 1991 an de Filmhoochschool in Potsdam en Regiestudium an. In dat glieke Johr warrt he dör sien Rull as döösbarteligen Polizisten in den Detlev Buck-Film Karniggels un kort dorop ut sien faste Rull as Tatort-Kommisar Kain bundswiet bekannt. Sien eerste Film as Speelbaas is 1995 Rache, to den he ok dat Dreihbook schreven hett. 2005 speel he den Familienvadder Michael Thiel in de Kummedie-Serie Nicht von dieser Welt.