Flunken (Insekten)

De Flunken (ok Flünken oder Flögels) vun Insekten könnt sik bannig verschelen na Form, Kleur, un wie se tohopenboot sünd. Insekten sünd de eersten Deerter ween, de flegen konnen, lang noch vör de Fleegsauriers un annere Deerter, as Vagels oder Fladdermüse. Mank den Stamm vun de Liddfööt (Arthopoda) könnt bloß de Insekten flegen. Ehre Flunken sünd anners tohopenboot un se arbeit‘ ok ganz anners, as annere Deerter ehre Flunken. So sitt in de Flunken keen Knaken in, vunwegen datt Insekten keen Knaken hefft. Insektenflunken kriegt ehre Stevigkeit dör Adern. De weert mit Hämolymphe vullpumpt, nadem dat Insekt to’n lesten Mol siene Huud uttrocken hett. Achterna weert se hart un deent as Rahmen. Wenn se hart weert, kaamt unner Umstänn ok de Farven an’t Licht. Vordem sünd se noch nich to sehn. Insekten kriegt jummers eerst ehre Flunken, wenn se dat leste Stadium as Nymphe verlaten hefft, oder wenn se ut ehre Poppe utkrapen sünd. Denn sünd se utwussen (adult) un eerst as adulte Deerter hefft se Flunken. De Budden oder Nymphen vun Insekten hefft also noch keen Flunken.

Dat is noch nich düütlich utforscht, wie Flunken overhoop tostannkamen sünd. Dat liggt dor an, datt noch keen fossile Twuschenformen vun Flunken funnen wurrn sünd. Bi Insekten hefft sik de Flunken ut dat tweede un drüdde Segment vun de Bost rutspunnen, also vun de Meso- un de Metathorax. Dat sünd ok Insektenfossilien funnen wurrn, dor seten noch Flunken tosätzlich an dat eerste Segment vun de Bost. De Fleegflunken könnt over dat Lief tohopenleggt weern, as Flegen dat doot, oder jummerslos vun’t Lief afstahn, as bi Goldpeer (nich bi de Jumfern), oder se liggt as harde Vörflunken an de Uppersiete vun dat Achterlief. Bi allerhand Insekten, as Wandlüse un Kävers sünd de Vörflunken (bovenup) hart un schuult de Huudflunken, wo de Deerter mit fleegt. En ganze Reeg vun Insekten, as enkelte Loopkävers oder Kakerlaken, hefft woll Flunken, man könnt dor nich mit flegen un leevt heel un deel up’e Eer.