Back Kookpunt Afrikaans Siedepunkt ALS Punto d'ebullición AN نقطة الغليان Arabic Puntu de bullidura AST Qaynama nöqtəsi Azerbaijani Punto kan pagkalagakaga BCL Тэмпература кіпення Byelorussian Тэмпэратура кіпеньня BE-X-OLD Температура на кипене Bulgarian
De Kaakpunkt vun en Reinstoff is en Poor vun Weerten in sien Phasendiagramm, dat ut de beiden physikaalschen Grötten Sättigungstemperatur un Sättigungsdampdruck an de Phasengrenzlien twüschen Gas un Fletigkeit besteiht. De sett sik also tosamen ut twee Tostandsgrötten, neemlich den Druck un de Temperatur, de bi’n Övergang vun en Stoff vun de fletige in de gasförmige Phaas en Rull speelt.
Ut’n Alldag sünd Kaakvörgäng bekannt un warrt tomeist mit hoge Temperaturen un Hitt verbunnen, man dat Kaken vun en cheemschen Stoff hangt vun sien cheemsch Tohopensetten af. Fletig Suerstoff, Waterstoff oder Stickstoff to’n Bispeel kaakt bi Temperaturen ünner -180°C.
De Kaakpunkt gifft de Bedingen an, de wiel den Phaaswessel vun en Stoff vun de Fletigen na de gasförmige Phaas vörherrschen doot. De Vörgang sülvst warrt as Kaken oder ok as Verdampen betekent. Bi den ümkehrten Vörgang, de Kondensatschoon nöömt waart, gellt – man blots bi Reinstoffen – de glieken Bedingen un de Kaakpunkt is identisch mit den Kondensatschoonspunkt. Bi’t Verdampen vun en Stoffmischen is dat Kaakverhollen aver ännert un man stellt en Kaakrebeet fast an de Steed vun een enkelten Kaakpunkt. Bi’n Phasenövergang vun de fletigen in de gasförmige Phaas ünner den Kaakpunkt snackt man vun Verdunsten.
In de Literatur warrt de Kaaktemperaturen normalerwies bi Normaldruck angeven, dat heet bi 1013,25 hPa. Disse Kaakpunkt warrt ok as Normalkaakpunkt betekent un de angeven Kaaktemperatur as Normalkaaktemperatur. De Begreep Kaakpunkt warrt dorbi faken as Kortform för de Normalkaaktemperatur bruukt un stellt in’n allgemenen Spraakbruuk en Synonym dorför dor. Formal is dat nich richtig, vun wegen dat dat den Kaakpunkt op en eenzig Weertenpoor reduzeert. To’n Bispeel warrt bi en Gaukaakputt utnütt, dat de Kaaktemperatur un de Kaakdruck afhangig sünd. Dör en högeren Druck vun meist een Bar (1000 hPa) kann man de Kaaktemperatur vun’t Water to’n Bispeel vun 100°C op ruchweg 120°C hoochbringen. Beide Temperaturen stellt Kaaktemperaturen dor, man blots bi ünnerscheedliche Drück. 100°C is de Kaaktemperatur ünner Normaldruck un stellt somit de Normalkaaktemperatur dor. De Begrepen to dörmischen is dorüm nich akkerat un schüll beter nich maakt warrn.