Landkreis Leer

Wapen	Kaart
Grunddaten
Bunnsland:	Neddersassen
Seet van’d Verwalten:	Leer
Gewesten:	1.085,77 km²
Inwahners:	169.809 Inwahners (Stand 31. Oktober 2019)
Lü per km²:	152
Kreisschlödel	03 4 57
Kfz-Kennteken:	LER
Updeelen:	19 Gemeenten
Adresse van’d Kreisverwalten:	Bergmannstraat 37 26789 Leer (Oostfreesland)
Websied:	www.landkreis-leer.de
Landraad:	Matthias Groote (SPD)
Kaart

De Landkreis Leer is en Landkreis in’ Nöördwesten van Neddersassen. He hett 169.809 Inwahners (Stand 31. Oktober 2019). He maakt de südelk Deel van Oostfreesland ut. In’d Nörden grenzt de Landkreis an de kreisfree Stadt Emden un an de Landkreis Auerk un ok en bietje an de Landkreisen Wittmund un Freesland an, in’d Oosten stött he an de Landkreisen Ammerland un Cloppenborg un in’d Süden an de Landkreis Eemsland. In’d Westen komen futt de Nedderlannen. Up dat Fastland hett de Landkreis ok en lüttje Waterkant an de Dullert. Man dat Eiland Börkum hört ok to de Landkreis Leer.

Veer historisk Landskuppen maken de Landkreis up dat Fastland ut: Dat Rheiderland (Westen), dat Overledingerland (Südoosten), dat Moormerland (Nörden) un dat Lengenerland (Nördoosten). In dat Wapen van de Kreis steiht en Kleeblatt mit veer Bladen för dit veer Landskuppen. Dat Korn tegen dat Kleeblatt steiht för de Landweertskupp in’d Landkreis Leer. Beid sitt up en Wapenschild, waar en witt Lööw mit en golden Kroon um sien Haals to sehn is. Da was dat Wapen wan de oostfreeske Hoovtling Focko Ukena, de in’d 15. Johrhunnert över de Kuntrei gebeden dee.