Mount Everest

Mount Everest
De Mount Everest vun dat Basislager ut sehn
Barggrupp:	Himalaya
Hööchd:	8.848 m över de See
Land:	Nepal
Kuntinent:	Asien
Normaalweg	Süüdrout
Koordinaten:	Koordinaten:27° 59′ N, 86° 55′ O27° 59′ N, 86° 55′ O

De Mount Everest is mit 8.848 m över de See de höögste Barg van de Eer un liggt in de Himalaya. De Barg höört to de 14 Achtdusender un to de Seven Summits. De Mount Everest dragt de Naam van de britsch Landvermeter George Everest. Up Nepali heet de Barg Sagarmatha (सगरमाथा Sagaramāthā „Vörkopp van de Heven“), up Tibeetsch Qomolangma (ཇོ་མོ་གླང་མ „Moder van dat Universum“, Uutspraak: „Tschomolangma“; engelsch Ümschrift Chomolungma).

De Mount Everest liggt in de Mahalangur Himal binnen de Regioon Khumbu in Nepal an de Grenz na Tibet in China to; de westliche un südööstliche van sien dree Bargkanten billen de Grenz tüschen de Länner. Up nepalees’sch Sied höört de Barg to de Sagarmatha-Natschonaalpark, de to dat UNESCO-Weltnatuurarv tellt. Up de Noordsied in China höört he to de Qomolangma National Nature Reserve, dat mit de Qomolangma-Biosphärenreservat övereenstemmt, dat de UNESCO uutwiest het.^[1]

Edmund Hillary un Tenzing Norgay is dat an de 29. Mai 1953 glückt, de Barg dat eerste Maal to bestiegen. Up de 8. Mai 1978 bestegen Reinhold Messner un Peter Habeler de Topp för’t eerste Maal sünner dat se extra Suerstoff to Amen bruukt hebben. Bit 2018 stegen an de 8.400 Minschen bit up de Bargtopp. Över 300 Bargstiegers bleven up de Weg bargrup oder de Weg bargdaal dood.^[2]

De Mount Everest is van de Seespegel uut meten de höögste Barg up de Eer. Twee anner Bargen könen bi anner Meetmethoden ook de Titel „höögste Barg up de Eer“ kriegen: De Vulkaan Mount Kea up Hawaii is de höögste Barg van de Bargfoot uut meten, de bi de Mount Kea ünner de See liggt; de Chimborazo in Ecuador is de höögste Barg van de Eerdmiddelpunkt uut meten.

1. ↑ Biosphere Reserve Information China QOMOLANGMA. In: The MAB Programme. UNESCO, archiveert von dat Original am 12. Februar 2016; afropen an’n 16. Juli 2024 (engelsch). 
2. ↑ Mount Everest: Klimawandel taut tote Kletterer frei. Archiveert von dat Original am 25. April 2023; afropen an’n 16. Juli 2024.