Organ (Biologie)

As Organ (vun gr. organon „Warktüüch“) warrt in de Biologie en sünneren Deel vun’n Lief betekent, de ut ünnerscheedliche Zellen un Geweven besteiht. Binnen veelzellige Leevwesen stellt en Organ en afgrenzte Funkschoonseenheit dor. Man snackt denn vun Organen, wenn de op en egen Organanlaag torüchgaht un en sünnere Organogenees dörloopt. Dat Tosamenspeel vun de Organen maakt tosamen den Organismus ut. In jemehr Funkschoon sünd de Organen direkt dör Organsystemen mitenanner verbunnen. Dat gellt nicht blots bi Minschen, man Organsystemen gifft dat ok bi Deerten un bi Planten. Sülvst Eenzellers hebbt ordente Funkschoonseenheiten binnen een Zell. Bi Prokaryonten leegt disse free in’t Zytosol vör, bi Eukaryoten sünd eenige vun jem vun en Membran ümslaten (Organellen).