Ton Peters (Dieren, 1952) is een dichter, schriever en redacteur die hum reurt in de Drèentse literaire wereld. Hij schref in 't Nederlaands en Drèents.
Peters hef jaoren in 't onderwies ewarkt en verhuusde begun jaoren tachtig vanuut Gorinchem naor Drenthe, waor e 't Drèents leerde. Zien wark bestiet onder meer uut cabaretliedties, verhalen, gedichten, light verse, liedteksten en besprekings. Onder de tiedschriften daor as e in epubliceerd hef, vaalt De wasknijper, De tweede ronde en Drèents letterkundig tiedschrift Roet. Van 't leste tiedschrift is e redacteur.
Mangs gebruukte Peters 't pseudoniem Otto van Gelder. Hij schref 't liefst vörmvaste poëzie, zoas sonnetten en rondielen.
Peters hef verscheiden literair-culturele evenementen initieerd, schref teksten veur cabaretgroepen en gef warkwinkels poëzie. In 1992 was e betrökken bij de oprichting van 't Drents Light verse Genootschap, umdet e 't wark van Drèentse dichters nog aordig zwaor op de haand vund.
In 2000 wun hij 't Noord-Nederlands Liedjesfestival mit de tekst van 't lied 'De allerlaatste winkel'. In 2007 organiseerde e mit Jan Veenstra de Zeuvendaagse, een zeuvendaagse literaire umstruning deur Drenthe, daor as tientallen schrievers an mitdeuden.
Dichtwark van Peters is verschenen in verscheiden bibliofiele uutgaven en bloemlezings.