Bardufoss

Bardufoss
stad
Land  Noreg
Kart
Bardufoss
69°03′52″N 18°30′42″E / 69.06441°N 18.51159°E / 69.06441; 18.51159
Wikimedia Commons: Bardufoss
Bardufoss lufthamn og Andselv

Bardufoss er ein by i Målselv kommune i Troms. Byen omfattar bydelane Andslimoen, Andselv og Heggelia. Bardufoss har om lag 2 500 ibuarar. Europaveg 6 går gjennom Bardufoss. Bardufoss lufthamn ligg sentralt i bygdelaget.

Sjølve Bardufoss voks for ein stor del fram då den tyske okkupasjonsmakta under 2. verdskrigen fekk bygt flyplass med hjelp av tvangsutskrivne nordmenn og krigsfangar. Etter verdskrigen bygde det norske Forsvaret ut området gjennom fleire tiår, så i dag er brorparten av folket på staden direkte eller indirekte knytt til Forsvaret. Bardufoss leir er samlenemning for Heggelia leir og Rusta leir, to leirar som ligg ca 500 meter frå einannan. Mellom Rusta og Heggelia leir ligg Istindportalen, eit velferdsbygg for soldatane, med kino, idrettshall og kiosk for sivile. Istindportalen hyser også fellesbibliotek for Forsvaret og Målselv kommune, i tillegg til kulturskulen i kommunen.

Bardufoss har vidaregåande skule med dei fleste praktiske fag som flyfag, byggfag og mekaniske fag, i tillegg til idrettsfag og studieførebuande fag. På Rustahøgda, mellom Andselv og Heggelia, ligg ungdomsskulen i bygda og Næringshagen i Målselv. Her har Forsvarets Høgskule ei avdeling. Ein symjehall og ein idrettshall ligg også her.

I Bardufoss sentrum, Andselv, ligg det daglegvarebutikkar og andre butikkar, apotek og vinmonopol. Nokre kilometer aust og søraust for Bardufoss ligg skianlegget Myrefjell og den mektige Målselvfossen. På Andslimoen ligg det helsesenter, tannklinikk, samisk skule, slakteriet Nortura, bilforhandlarar og ein caravan-forhandlar.


From Wikipedia, the free encyclopedia · View on Wikipedia

Developed by Nelliwinne