Bodhisattva

Bodhisattva (sanskritform, pali bodhisatta, av bodhi 'våken' og sattva 'vesen') er eit omgrep innan buddhismen om ein framtidig buddha. Omgrepet er særleg viktig innan mahayana-buddhismen, men finst også innan theravada. Siddhartha Gautama, i tida før han blei opplyst som Buddha eller i tidlegare liv, er kalla bodhisattva. Ein omtalar også den komande buddhaen Maitreya som bodhisattva. Innan mahayana bruker ein også omgrepet om kvar ein som har gjeve løfte om å søka mot oppvakning og ei rekkje oppvakna vesen som i staden for å tre inn i nirvana vel å bli gjenfødde og hjelpa alle levande vesen til å utvikle sin buddhanatur fram mot full opplysing. Desse vesena blir framstilte som frelsarfigurar, ofte som unge prinsar, og er omfatta av bøner og kulthandlingar.