Eurovision Song Contest 2017

Eurovision Song Contest 2017
Offisiell tittel 62. Eurovision Song Contest
Dato
Semifinale 1	9. mai 2017[1]
Semifinale 2	11. mai 2017
Finalen	13. mai 2017
Vertskap
Stad International Exhibition Centre i Kiev i Ukraina[1]
Programleiar(ar) Oleksandr Skitsjko Volodymyr Ostaptsjuk Timur Mirosjnytsjenko[2]
Kringkastar(ar) Natsionalna Telekompanija Ukraïny
Varigskap
Opningsnummer
Pausenummer
Bidrag
Antal bidrag 42[3]
Attende Portugal Romania
Trekte seg Bosnia-Hercegovina Russland
Kart
Røysting
Vinnar Portugal med «Amar pelos dois» av Salvador Sobral.
Eurovision Song Contest
Stockholm 2016 Lisboa 2018

Eurovision Song Contest 2017 (ESC 2017), offisielt 62. Eurovision Song Contest, var den 62. utgåva av Eurovision Song Contest. Tevlinga vart arrangert i Kyiv internasjonale utstillingssenter i Ukraina, etter at Jamala vann med songen «1944» i 2016. Dette var andre gongen Ukraina arrangerte tevlinga; fyrste gongen var i 2005, også det i Kyiv. Tevlinga bestod av tre sendingar: ein semifinale tysdag 9. mai, ein semifinale torsdag 11. mai og finalen laurdag 13. mai 2017. Programleiarar for alle sendingane var Oleksandr Skitsjko, Volodymyr Ostaptsjuk og Timur Mirosjnytsjenko.^[4] 42 land deltok i tevlinga, like mange som året før. Romania og Portugal, som for øvrig vann tevlinga, kom tilbake etter eitt års pause, mens Bosnia-Hercegovina, som deltok i 2016, trekte seg på grunn av økonomiske problem hos kringkastaren BHRT. Opprinneleg skulle også Russland delta, men trekte seg nokre veker før tevlinga sidan den russiske deltakaren, Julija Samojlova, vart nekta innreise til Ukraina.

Av deltakarlanda måtte 36 land gjennom éin av dei to semifinalane, og 20 av dei kvalifiserte seg til finalen laurdag 13. mai. I tillegg deltok vertslandet Ukraina og «dei fem store landa» i finalen, slik at totalt 26 land deltok i finalen. Vinnaren av Eurovision Song Contest 2017 vart Salvador Sobral frå Portugal med songen «Amar pelos dois». Vinnarsongen hadde portugisisk tekst og var skriven av systera til Sobral, Luísa Sobral. Dette var den fyrste sigeren til Portugal i Eurovision Song Contest. Det var også fyrste gongen sidan 2007, då Marija Serifovic vann med songen «Molitva», at ein ikkje-engelskspråkleg song vann Eurovision Song Contest. Salvador Sobral fekk den høgaste poengsummen i Eurovision Song Contest til då, med 758 poeng. Bulgaria kom på andreplass med 615 poeng, følgd av Moldova med 374 poeng.

Det norske bidraget var songen «Grab the Moment», framført av JOWST og Aleksander Walmann. Den norske songen deltok i den andre semifinalen, der den enda på femteplass og dimed kvalifiserte seg til finalen. Til slutt enda Noreg på ein tiandeplass i finalen – den fjerde topp ti-plasseringa til Noreg sidan 2013. De tre sendingane vart sett av 182 millioner sjåarar verda over, ein nedgang på 22 millionar frå året før.

1. ↑ ^{1,0 1,1} «Kyiv to host Eurovision 2017!» (på engelsk). Eurovision.tv. Henta 9. september 2016. 
2. ↑ «Let's hear it for the boys! Meet the hosts of Eurovision 2017». Eurovision.tv. Henta 27. februar 2017. 
3. ↑ «43 countries to participate in Eurovision 2017» (på engelsk). Eurovision.tv. Henta 31. oktober 2016. 
4. ↑ Jordan, Paul (27. februar 2017). «Let's hear it for the boys! Meet the hosts of Eurovision 2017». eurovision.tv. European Broadcasting Union. Henta 27. februar 2017.