Joseph Williams

Joseph Williams
Joseph Williams med Toto i Örebro i Sverige den 3. juli 2013.
Fødd	1. september 1960 (64 år)
Fødestad	Santa Monica
Fødenamn	Joseph Stanley Williams
Opphav	Santa Monica i California
Aktiv	1982 til i dag
Sjanger	Rock
Instrument	vokal, klaverinstrument
Tilknytte artistar	Toto
Verka som	Songar, filmkomponist
Mor	Barbara Ruick
Far	John Williams

Joseph Stanley Williams (fødd 1. september 1960) er ein amerikansk rockesongar og filmmusikkomponist, mest kjend for arbeidet med rockebandet Toto. Han er son av filmkomponisten John Williams og skodespelarinna/songar Barbara Ruick og barnebarn av jazztrommeslagaren Johnny Williams og skodespelarane Melville Ruick og Lurene Tuttle.

Joseph Williams var solovokalist med Toto i midten og slutten av 1980-åra og var med på albuma Fahrenheit (1986) og The Seventh One (1988) før han slutta på grunn av personlege problem. Han er òg med på Toto-albumet Falling in Between i 2006. I 2010 kom Williams med som fast songar i Toto igjen.^[1]

Williams gav ut det første soloalbumet sitt i 1982 og etter han slutta i Toto kom fleire album. Mange av medlemmane i Toto har spelt på soloprosjekta hans.

Joseph Williams har òg skrive musikk til mange filmar og fjernsyn, som «Roswell» og «The Lyon's Den» med Rob Lowe. I 2003 vart han nominert til ein Emmypris for kjenningsmelodien til serien Miracles.^[2]

Som studiomusikar har Williams arbeidd med Peter Cetera, Jay Graydon, Jon Anderson og Chicago.

I animasjonsfilmen Løvenes konge song han stemma til den vaksne Simba på songane «Hakuna Matata» og «Can You Feel the Love Tonight».

1. ↑ «Official TOTO Website - Joseph Williams». www.toto99.com. Henta 17. oktober 2015. 
2. ↑ «Awards for Joseph Williams». IMDb.com. Henta 17. oktober 2015.