Kontorsjef Johan Henrik Cappelen

Sjå også Johan Henrik Cappelen (1795-1850) og Johan Cappelen (1889-1947).

Johan Henrik Cappelen (10. desember 1838–4. oktober 1900) var ein norsk jurist og embetsmann, som var kontorsjef i Stortinget 1871-1900.

Cappelen var fødd i Leikanger i Sogn, der faren Johan Henrik Cappelen var sorenskrivar. Etter faren var død i 1850 budde familien i Kristiania. Han var frå 1859 tilsett som referent i Stortinget, referentsjef frå 1868. Medan han arbeidde som referent studerte han jus, ferdig utdanna cand. jur. i 1862. Frå 1871 var han arkivar og kontorsjef på Stortinget fram til han døydde. I si tid på Stortinget fekk han innført det såkalla Gabelsbergers stenografisystem.

I 1889 vart Johan Cappelen riddar av 1. klasse av St. Olavs orden for «fortjenstfuld Virksomhed i sin Stilling».