Batalha de Stormberg

La batalha de Stormberg se debanèt lo 10 de decembre de 1899 durant la Segonda Guerra dels Boers (1899-1902). Opausèt una armaa britanica comandaa per William Forbes Gatacre (2 000 òmes) a un ensemble de fòrças, eissias de las doas republicas boers, menaas per Jan Henrick Olivier (2 300 òmes). S'achabèt per una victòria dels Boers.

Las tropas de Gatacre avián per objectiu d'ocupar las midlands situaas au sud de l'Estat Liure d'Aurenja per protegir la colonia dau Cap. Pasmens, l'operacion foguèt fòrça mau preparaa. D'efiech, deguèron esperar d'oras per trobar las locomotivas necessàrias a lor desplaçament. Puei, mandèron pas d'unitats de reconeissença per cercar la preséncia de Boers dins la region. Enfin, lo comandament e la comunicacion entre las diferentas unitats èran pas eficaç.

Lo 8 de decembre, Gatacre aprenguèt la presa de Stormberg per los Boers. Ordonèt una marcha de nuech vers la vila, mas los guidas se perdèran. Aquò permetèt als Boers de detectar los Britanics e d'installar un canon de 75 mm per los bombardar. Lo combat comencèt ansin a l'auba. Gatacre ordonèt un movement de contornament, mas una partia de sas tropas ataquèt directament sensa coordinacion amb la resta dau dispositiu britanic. Lo caòs foguèt rapidament agravat per de tirs fratricidas de l'artilhariá britanica. Gatacre ordonèt alora la retiraa, mas una partia de son armaa recebèt pas l'òrdre e foguèt capturaa. La resta dels Britanics foguèt secutada per los Boers. Los Boers contunhèron pas la perseguia e esplechèron pas lor victòria. Aquò èra un limit de sas tropas compausaas de volontaris amb una experiéncia tactica importanta, mas de possibilitats estrategicas feblas. L'arribaa de renfòrç permetèt als Britanics d'estabilizar sa posicion a Molteno, 15 km au sud-est de Stormberg. Lo bilanç uman de la batalha foguèt larjament a l'avantatge dels Boers amb 34 òmes perduts^[1] contra 790 tuats, bleçats e presoniers per los Britanics^[2].

1. ↑ 8 tuats e 26 bleçats.
2. ↑ 26 tuats, 68 bleçats e 696 presoniers.