Cuba

Cuba Cuba (espanhòu)
Bandièra Escut d'armas
Capitala e ciutat mai granda L'Avana 22° 00′ N, 79° 30′ O
Gentilici Cuban, cubana
Forma de govèrn Estat comunista de partit unic
President Miguel Díaz-Canel
Superfícia 104en
• Totala 109,884 km²
• Aiga 0,94 % %
Populacion 106en
• Totala (2016) 11,239,224 ab.
• Densitat 102.3 ab./km²
Domeni internet .cu

Cuba (AFI: /ˈkybɔ, -ba/),^[1] oficialament la Republica de Cuba (en espanhòu: República de Cuba),^[2][3] es un estat insular de Cariba format per l'illa omonima, l'illa de la Joventut e autreis illas adjacentas. La capitala n'es L'Avana.^[3]

La formacion dau país comencèt au sègle XVI amb la colonizacion de l'illa per leis Espanhòus que decimèron rapidament la populacion indigèna (principalament de Taínos e de Ciboneis). Sensa metaus preciós, la colonia interessèt pauc lei colons fins a la Revolucion Francesa qu'entraïnèt l'afondrament de l'industria sucriera cariba. Au sègle XIX, Cuba conoguèt ansin un desvolopament important e venguèt la premiera region de produccion de sucre amb de transformacions socialas importantas (arribada d'esclaus, formacion d'un elèit economic de plantaires...). Aquò suscitèt de tensions mai e mai grèvas que favorizèron l'aparicion de movements independentistas. D'insurgents prenguèron lo contraròtle d'una partida de l'illa dins lo corrent deis ans 1890 e obtenguèron l'ajuda deis Estats Units.

Dins aquò, la victòria estatsunidenca transformèt Cuba en protectorat de Washington, çò que reglèt pas lei problemas sociaus de l'illa. Una multiplicacion dei revòutas e la crisi economica de 1929 entraïnèron ansin la presa dau poder per un militar dich Fulgencio Batista. Se mantenguèt au poder fins a la capitala d'una insureccion comunista menada per Fidel Castro en 1959. Lo regime novèu se turtèt rapidament a l'ostilitat deis Estats Units e deguèt se raprochar de l'URSS. Aquò li permetèt d'enregistrar de progrès economics nombrós mai la disparicion dau blòt sovietic lo laissèt solet en fàcia de Washington. L'illa conoguèt alora una grèva crisi economica que se reglèt lentament amb la liberalizacion de certanei sectors economics coma lo torisme. En parallèl, d'esfòrç diplomatics importants son en cors per assaiar de normalizar lei relacions amb leis Estats Units que somèton l'economia cubana a un embarg dempuei leis ans 1960.

Au nivèu culturau, Cuba es un centre important dins la Mar Cariba, reconeguda per sa musica, sa literatura e sei cigarros. En particular, l'illa es a l'origina de plusors estiles musicas que son uei largament difusats dins lo mond entier coma la salsa.

1. ↑ «Preconizacions del Conselh de la Lenga Occitana» (en occitan) p. 121.
2. ↑ «About Cuba - The World Factbook (2023 Archive)», 13 de novembre de 2024. www.cia.gov.
3. ↑ ^3,0 et ^3,1 «Constitución de la República de Cuba. Título I: Fundamentos Policitos. Artículo 2.» p. 2. www.cuba.cu. «El nombre del Estado cubano es República de Cuba, el idioma oficial es el español y su capital es La Habana.»