Back Poujadisme Catalan Poujadismus German Poujadism English Poujadismo Spanish Poujadisme French Poujadismo Italian Poujadisme Dutch Pujadismo Portuguese Poujadism Romanian
Lo pojadisme, del nom de Pèire Pojada, foguèt un movement politic e sindical francés efemèr, sovent qualificat d'extrèma drecha, aparegut en Occitània en 1953 (mai precisament : a Sant Seren), e desaparegut de caps 1958.
Aquel movement reivindicava la defensa dels comerçants e dels artisans, que considerava coma mes en dangièr pel desvolopament dels supermercats dins la França de l'aprèp-guèrra ; d'autra part, condemnava l'ineficacitat del parlamentarisme de la Quatrena Republica.
Objectivament, lo pojadisme designa las activitats de l'Union de defensa dels comerçants e artisans, lo sindicat dirigit per Pèire Pojada, o de l'Union e fraternitat francesa, entitolat alternatiu emplegat per las eleccions.
Lo tèrme « pojadisme » es vengut una expression pejorativa designant un movement politic conservator a tendéncia reaccionària de las classas mejanas fins a la pichona borgesiá.
L'Union de defensa dels comerçants e artisans (UDCA) es un sindicat fondat en Occitània a Sant Seren (dins Òlt) seguida a una revòlta antifiscala de pichons comerçants dins una societat encara rurala que s'inquieta la montada en poténcia de la granda distribucion.
Lo movement obten en dos ans dins França tota mai de 2 milions de voses e 52 deputats (siá 12 %) a las eleccions legislativas de 1956, prenent alavetz per entitolat L'Union e fraternitat francesa (UFF).
Entre 1956 e 1958, L'Union e fraternitat francesa foguèt ostila al tractat de Roma, favorabla a conservar l'Argeria francesa, e demandèt la supression dels contraròtles fiscals dels pichons comerçants. Refusèt tanben de votar la fisança al governament de Guy Mollet pendent la crisi de la Robina de Suèz.
Lo movement aurà pas durat que qualques annadas en França, fins a la fin de la Quatrena Republica e encara en s'aliant ambe los gaullistas. Desapareis quasi completament ambe la Cinquena Republica en 1958. Totes los deputats elegits jos la bandièra pojadista en 1956 son batuts a las eleccions legislativas francesas de 1958, a l'excepcion de dos d'entre eles, demest los quals Jean-Marie Le Pen, futur president del Front Nacional.
Lo tèrme pojadista es de còps utilizat abusivament per qualificar negativament un discors politic o social jutjat demagogic, sovent sens rapòrt fin finala ambe las idèas del movement original lançat per Pèire Pojada, o mai generalament per designar un populisme reaccionari.