Vescomtat de Ventadorn

Vescomtat de Ventadorn

Administracion
Capitala	Chasteu de Ventadorn

Lo vescomtat puei comtat puei duchat-pariá de Ventadorn era un ancian principat feudau dau Bas Lemosin, dins l'actuau departament de Corresa, comprenent las regions d'Ussel, de Maismac, de Nòu Vic e daus Gletons. Correspond aperaquí a l'arrondiment actuau d'Ussel e a la Montanha Lemosina (replanat de Miuvachas). Sas frontieras fluctueren au cors daus temps, mas gardet 'na certana omogeneitat a l'entorn dau chasteu de Ventadorn. S'estendet daus còps juscanta Gimel e a la region au nòrd de Tula. La vila de Corrèsa ne faguet partida, mas sa frontiera orientala fuguet totjorn la ribiera de Dordonha que la separava d'Auvèrnhe, ente aguet ça que la de possessions nombrosas.

Demest las ancianas senhoriás d'aqueu vescomtat, las mai importantas eran au segle XII Sodelhas e Mirambel. Sus lo territòri dau vescomtat se trobavan las abadiás de Maismac, de Sent Angel, de Bona Sanha (prep de Combrossòl, benedictina) e de Bona Aiga (prep d'Ussel, cisterciana) en mai de priorats nombrós.