Di Dos Guera Mundial

Guera Mundial II
Parti di Edat kontemporáneo
Fecha	1 di sèptèmber 1939–2 di sèptèmber 1945
Lugá	Oropa, Oséano Pasífiko, Sùit-ost Asia, Medio Oriente, Oseania, Region Mediteráneo i Afrika
Resultado	Nazi Alemania i Hapon derotá, asenshon di superpodernan Merka i Union Soviétiko
Kousa	Asia: Insidente di Marco Polo Brug Oropa: Invashon aleman di Polonia
Partido den Konflikto
Aliadonan:  Reino Uni  Estadonan Uni di Amérika  Union Sovietiko  China Poder di As:  Nazi Alemania  Imperio hapones  Reino di Italia (te 3 di sèptèmber 1943)
Lider i komandante
Winston Churchill Franklin Roosevelt (†) Harry Truman Joseph Stalin Chiang Kai-shek Adolf Hitler (†) Hirohito Hideki Tojo Benito Mussolini (†)
Kousalidat
Morto militar: Mas ku 14.000.000 Morto sivil Mas ku 36.000.000 Morto militar: Mas ku 8.000.000 Morto sivil Mas ku 4.000.000
◀  Guera Mundial I Guera Friu  ▶
Imágennan riba Wikimedia Commons
[Editá Wikidata] · [Manual]

Di Dos Guera Mundial (1 di sèptèmber 1939–2 di sèptèmber 1945) tabata un konflikto militar entre dos koalishon: Aliadonan i Poder di As. E guera a involvi mayoria di e nashonnan, inkluyendo tur poder grandi na mundu. Den un estado di guera total, e nashonnan mayor a invertí tur kapasidat ekonómiko, industrial, i sientífiko disponibel pa yuda e esfuerso di guera, bruhando e distinshon entre rekursonan militar i sivil.

Marka pa eventonan signifikante involviendo sivilnan, inkluyendo e Holokousto i bombardeo atómiko ariba Hiroshima i Nagasaki. E tabata e guera mas plamá na mundu, ku mas ku 100 mion persona militar mobilisá, i e konflikto mas mortal den historia humano resultando dentre 50 pa 70 mion morto, mas ku mita tabata sivil. E kantidat asombroso aki a inkluí víktimanan di genosidio, manera e Holokousto , i tambe esnan ku a muri den masakre, hamber i malesa.

Despues di e viktoria di e podernan Aliá, Alemania, Austria, Hapon i Korea a wòrdu okupá, i tribunalnan di krímen di guera a kondusí kontra lidernan Aleman i Hapones.

E kousa di Segundo Guera Mundial a surgi for di tenshonnan no resolvé despues di Promé Guera Mundial i e oumento di fasismo na Oropa, huntu ku militarismo na Hapon. Eventonan klave ku a kondusí na e konflikto a inkluí e invashon di Hapon di Manchuria, e Guera Sivil Spañó, e brote di e Di Dos Guera sino-hapones, i Alemania su anekshonnan di Austria i Akuerdo di München.

E guera a kuminsá ofisialmente dia 1 di sèptèmber 1939, ora ku Alemania Nazi, dirigí pa Adolf Hitler, a invadí Polonia. Esaki a pone ku Reino Uni i Fransia a deklará guera kontra Alemania. Bou di e Pakto Molotov-Ribbentrop, Alemania i Union Soviétiko a bai di akuerdo pa dividí Polonia i establesé "esferanan di influensia" den Ost Oropa. Siguientemente, na 1940, Union Soviétiko a aneksá e estadonan báltiko i tambe teritorionan na Finlandia i Rumania.

Despues di e kaida di Fransia na yüni 1940, e guera a sigui prinsipalmente entre Alemania i e Imperio Britániko. Konfliktonan klave durante e periodo aki a inkluí Kampaňa di Balkan, Mediteráneo i Medio Oriente, e Bataya aéreo di Reino Uni i e Blitz, i e Bataya naval Atlántiko. Pa medio di un seri di kampaña i aliansa militar, Alemania a konsolidá kontrol ariba gran parti di Oropa kontinental i a formalisá e aliansa di As ku Italia, Hapon i otro nashonnan.

Na yüni 1941, Alemania a guia e podernan di As Oropeo den invadí Union Soviétiko, ku a habri e Frontera Oriental. E ofensiva aki inisialmente a logra gana teritorio signifikante, eskalando e eskala mundial di e guera.

Hapon a buska pa dominá Ost Asia i Asia-Pasífiko, enbolbí den guera ku Repúblika di China pa 1937. Na desèmber 1941, Hapon a lansa un seri di atake ariba teritorionan merikano i britániko den sur-ost Asia i Pasífiko Sentral, inkluyendo Pearl Harbor na Hawaii. E atakenan aki a pone ku Merka i Reino Uni a deklará guera kontra Hapon, sigui pa e podernan di Axis Oropeo deklará guera kontra Merka.

Hapon a logra viktorianan signifikante, konkistando gran parti di kosta di China i sur-ost Asia. Sinembargo, su ekspanshon den Pasífiko a wòrdu para meimei di 1942 despues di su derota na e Bataya naval di Midway. Rònt di e mesun tempu, Alemania i Italia a enfrentá un gran kontratempu, inkluyendo nan derota na Nort Afrika i e pèrdida di Alemania na Stalingrad na Union Soviétiko.

E kambio di kurso a sigui na 1943, ku éksitonan klave di Aliadonan: derotanan Aleman ariba e Frontera Oriental, e invashonnan di e Aliadonan di Sisilia i Italia, i avansenan kontinuo di e Aliadonan den Pasífiko. E pèrdidanan aki a forsa e podernan di As den un retiro stratégiko na tur frontera.

Na 1944, e Aliadonan Oksidental a invadí Fransia okupá pa Alemania na Normandia, miéntras ku Union Soviétiko a rekuperá teritorionan pèrdí i a pusha forsanan di As den direkshon wèst. Na mes momentu, Hapon a sufri derotanan den Asia kontinental, miéntras ku e Aliadonan a paralisá e Marina Hapones i a kapturá islanan krítiko den Pasífiko, debilitando mas ainda e posishon di Hapon.

E dos lider di poder di As, Adolf Hitler, i Benito Mussolini

E lidernan Aliado prinsipal di Guera Mundial II, Winston Churchill, Franklin D. Roosevelt i Joseph Stalin

E guera na Europa a terminá ku e liberashon di teritorionan okupá pa Alemania i e invashon di Alemania dor di e Aliadonan Oksidental i Union Soviétiko. E kampaña aki a kulminá den e kaida di Berlin den man di forsanan soviétiko, e suisidio di Adolf Hitler i e entrega inkondishonal di Alemania ariba 8 di mei 1945.

Den Pasífiko, e nengamento di Hapon pa entregá bou di e términonan di e Deklarashon di Potsdam a kondusí Merka na tira bòmnan atómiko ariba Hiroshima (6 di ougùstùs) i Nagasaki (9 di ougùstùs). Konfrontá ku e menasa inminente di un invashon na eskala kompletu di e archipiélago Hapones, e perspektiva di bombardeonan atómiko adishonal, i e deklarashon di guera i invashon di Manchuria pa Union Soviétiko, Hapon a anunsiá su entrega inkondishonal ariba 15 di ougùstùs. E entrega formal a wòrdu firmá dia 2 di sèptèmber 1945, ku ta marka ofisialmente e fin di Segundo Guera Mundial.

Segundo Guera Mundial a reformá polítika i sosiedat mundial, formando e base pa relashonnan internashonal desde e último mita di siglo 20. Nashonnan Uni a wòrdu establesé pa promové koperashon internashonal i prevení konfliktonan den futuro, ku China, Fransia, Union Soviétiko, Reino Uni i Merka ta sirbi komo miembronan permanente di su Konseho di Seguridat.

E guera tambe a marka e asenshon di Union Soviétiko i Merka komo superpodernan rival, establesiendo e esenario pa e Guera Friu. Miéntras tantu, e kalamidat denter Oropa a debilitá su podernan grandi, aselerando e dekolonisashon di Afrika i Asia. Paisnan ku industrianan daña pa guera a enfoká ariba rekuperashon i kresementu ekonómiko, loke a kondusí na ekspanshon signifikante despues di guera den hopi region.