|
Ël De pictura (an piemontèis "An sla Pitura", an fiorentin Sulla Pittura) l'é 'n tratà an sla pitura scrivù da Leon Battista Alberti, dnans, dël 1435, an volgar fiorentin, an dedicandlo a Filippo Brunelleschi. Apress a l'ha scrivùlo an latin. An costa redassion a l'ha giontà d'àutri pensé e 'd coression dij boro, e a l'ha s-ciairì vàire ròbe, an rampiassand ij nòm e ij términ.
A l'é stàita la prima euvra ëd na trilogìa 'd tratà an sj'art "magior" ch'a l'han avù 'n largh spantiament ant l'ambient umanìstich, rivanda a esse trèi test fondamentaj dl'Arnassensa. J'àutri doi a son ël De re aedificatoria (an sl'architetura, 1454) e 'l De statua (an sla scultura, con na datassion incerta, forse dël 1462).
L'euvra a l'ha avù 'n sùit pùblich ant ël setor dla pràtica 'd pitura arnassenta, combin ch'a l'avìa 'n bon valor didàtich. La version volgar a l'é restà bastansa dësmentià fin-a quand ch'a l'é stàita torna edità dël 1847. La version latin-a a l'ha avù pi dë spantiament e a l'é stàita stampà an partìe, dont la prima ël 1540 a Basilea. Tutun con ës tratat-sì Alberti a l'ha anfluensà, da na mira teòrica, pa mach l'Arnassensa toscan-a (Leonardo da Vinci, Piero della Francesca), ma tut lòn ch'a l'é peui disse an sla pitura fin-a 'l dì d'ancheuj.
|
