La Pro Grigioni Italiano (Pgi) è ina associaziun fundada l'onn 1918 a Cuira, en il chantun Grischun, cun la finamira dad augmentar la solidaritad tranter las vals dal chantun da lingua taliana (vals Puschlav, Bregaglia, Mesauc, Val Calanca sco era la localitad da Beiva). La sedia principala sa chatta a Cuira, la chapitala dal Grischun.
La Pro Grigioni Italiano promova il linguatg e la cultura taliana en l'entira Svizra, spezialmain en il Grischun talian e la Svizra taliana.
Il Grischun talian s'extenda per 958 km² e dumbra ca. 14'000 abitants. Quai correspunda a 13% da la surfatscha dal Grischun ed 8% da la populaziun grischuna.
La Pro Grigioni Italiano ha secziuns en il Grischun:
- Pgi Bregaglia, che s'occupa da la Val Bregaglia e da Beiva, cun sedia a Soglio
- Pgi Valposchiavo, che s'occupa da la Val Puschlav, cun sedia a Puschlav
- Pgi Moesano, che s'occupa da la Val Mesauc e da la Val Calanca, cun sedia a Roveredo
- Secziun Cuira
- Secziun Tavau
sco era en il rest da la Svizra:
- Pgi Berna (chantun Berna)
- Pgi Lugano (chantun Tessin)
- Pgi Romandia, per la Svizra romanda, cun sedia a Genevra (chantun Genevra)
- Pgi Sopraceneri, cun sedia a Bellinzona (chantun Tessin)
- Pgi Zurigo a Turitg (chantun Turitg)