Articulu in logudoresu
Su referendum consultivu sardu de su 2011 est istadu unu referendum rezonale de tipu consultivu chi at tentu logu in Sardigna in sas dies de su 15 e 16 maju de su 2011. Su referendum lu aìat propostu Sardigna Natzione Indipendentzia, pro dare modu a sos sardos de si esprìmer a pizu de sa possibilidade de fraigare in s'isula tzentrales elettronucleares o a bi allogare iscorias nucleares, cun su Decretu n.1 de su 30 de bennalzu de su 2011. Su quorum si lompìat cun su 33% de sos tzittadinos sardos chi bolìat sa leze rezonale n.20 de su 1957. Sa dimanda posta a referendum fit:
« (IT) Sei contrario all'installazione in Sardegna di centrali nucleari e di siti per lo stoccaggio di scorie radioattive da esse residuate o preesistenti? » |
Sa dimanda in su referendum sardu nche ponìat in mesu péri sas iscorias, a differentzia de cussu abrogativu italianu chi at tentu logu unu mese a pùstis in sas dies de su 12 e 13 de làmpadas, chi imbètzes arresonaìat de su fraigamentu de tzentrales elettronucleares ebbìa. Su referendum rezonale lu at amparadu sa zunta rezonale, chi tando nde fit a cabu Ugo Cappellacci, accorpende sas eletziones amministrativas. Custu referendum tenìat solu balore consultivu, non cumpromittende nen su gubernu sardu nen cussu de s'istadu italianu: punnaìat a esser unu messazu politicu, bida sa partetzipadura populare a su referendum e su chi nde est resurtadu dae in ìe.