Camila Cabello

Camila Cabello
Cabello 2020-yilda
Umumiy maʼlumot
Tavalludi	Karla Camila Cabello Estrabao 3-mart 1997-yil (1997-03-03) (27 yosh) Cojímar, Gavana, Kuba
Janrlar	pop musiqa, zamonaviy ritm va blyuz, Latin pop va Gothic pop
Kasbi	Qoʻshiqchi qoʻshiqnavis aktrisa
Faoliyat yillari	2012 – hozirgacha
Leybllar	Epic Syco
Fuqaroligi	AQSh
Hamkorligi	Fifth Harmony Shawn Mendes
Veb-sayt	camilacabello.com
Imzosi

Karla Camila Cabello Estrabao (talaffuzi: Karla Kamila Kabeyo Estrabao; 3-mart 1997-yilda tugʻilgan)^[1] asli kubalik boʻlgan amerikalik qoʻshiqchi va qoʻshiqnavisdir. U 2012-yilda The X Factor USA teleshousida tashkil etilgan Fifth Harmony nomli qizlardan iborat guruh aʼzosi oʻlaroq shuhrat qozonib, Syco Music va Epic Records studiyalari bilan shartnoma imzoladi. Fifth Harmony guruhi aʼzosi boʻlgan paytda, Cabello Shawn Mendes bilan birgalikda ijro etgan „I Know What You Did Last Summer“ va Machine Gun Kelly bilan birgalikda ijro etgan „Bad Things“ singllarini chiqarib, yakkaxon artist sifatida karyerasini boshladi. Yuqoridagi ikki singldan ikkinchisi Billboard Hot 100 chartida toʻrtinchi pogʻonadan oʻrin ham oldi. Cabello 2016-yilning oxirlarida guruhni tark etib, koʻplab ashulalarni, jumladan Pitbull bilan birgalikda ijro etgan „Hey Ma“, J Balvin bilan birgalikda ijro etgan Forsaj 8 filmi uchun soundtrack (2017) hamda ilk solo singli boʻlmish „Crying in the Club“ ashulalarini ommaga havola etdi.

Cabelloning ilk studiyaviy albomi Camila (2018) boʻlib, Billboard 200 chartida birinchi oʻrinni egallab, choʻqqiga erishdi. Albom musiqa tanqidchilari tomonidan xush qarshilanib, Amerika ovoz yozish sanoati assotsiatsiyasi (inglizcha: Recording Industry Association of America) tomonidan platina sertifikatini qoʻlga kiritdi.^[2] Albomning yetakchi singli boʻlmish „Havana“ ashulasi AQSh va Birlashgan Qirollik kabi bir qancha mamlakatlar musiqiy chartlarida choʻqqiga erishdi. Albomdagi „Never Be the Same“ singli ham koʻplab davlatlar chartlarida yuqori oʻntalikka kirdi. Cabelloning 2019-yilda chiqarilgan „Señorita“ (Mendes bilan duet) ashulasi uning Billboard Hot 100 chartida choʻqqiga erishgan ikkinchi singli boʻldi. Ikkinchi studiyaviy albomi — Romance (2019) Billboard 200 chartida uchinchi, Kanadada esa birinchi oʻrinni band etdi. U aktrisa sifatida ham oʻzini sinab koʻrdi, jumladan 2021-yilda tasvirga olingan Cinderella filmida bosh (titular) rolni ijro etdi. Cabelloning uchinchi studiyaviy albomi Familia boʻlib, 2022-yilda chiqarilishi kutilmoqda. Albomning yetakchi singli boʻlmish „Donʼt Go Yet“ 2021-yilning iyulida albom nomi bilan birga ommaga taqdim etildi.^[3]

Xalqaro fonografiya sanoati federatsiyasi koʻra, Cabello musiqiy platformalarda milliardlab streamlar toʻplagan boʻlib, uning „Havana“ ashulasi 2018-yilning eng koʻp sotilgan raqamli singli boʻldi. Cabello koʻplab yutuqlarga, jumladan ikki marta Latin Grammy Awards, besh marta American Music Awards va bir marta Billboard Music Awardga sazovor boʻlgan. 2021-yilning oktyabrida „Havana“ olmos sertifikatni qoʻlga kiritib,^[4] buning ortidan Cabello ushbu sertifikatni olgan ilk hispanik ayol boʻldi.^[5]

1. ↑ Braidwood, Ella „21 geeky facts about Camila Cabello“. NME (6-mart 2018-yil). Qaraldi: 6-fevral 2019-yil.
2. ↑ „American certifications – Camila Cabello“ (en). Amerika ovoz yozish sanoati assotsiatsiyasi. Qaraldi: 23-sentyabr 2021-yil.
3. ↑ „Camila Cabello announces new album 'Familia', shares single 'Don't Go Yet'“ (en-GB). NME (2021-yil 23-iyul). Qaraldi: 2021-yil 7-dekabr.
4. ↑ Mier, Tomás „Camila Cabello Joins Cardi B as the Only Latinas with a Diamond-Certified Song, Thanks to 'Havana'“ (en). PEOPLE.com (4-oktabr 2021-yil). Qaraldi: 2021-yil 7-dekabr.
5. ↑ Montalván, Karla „Camila Cabello is the First Hispanic Woman Honored With Diamond-Certified Single Award“ (es). People en Español (5-oktabr 2021-yil). 2021-yil 22-oktyabrda asl nusxadan arxivlangan. Qaraldi: 2021-yil 7-dekabr.