Bernardus Smietegelt ok wè Smytegelt, Smytegeld of Smijtegeld, (Goes, 20 auhustus 1665 - Middelburg, 6 meie 1739) was een bekende Zeêuwse dômenee. Ie weir 'eboren in Goes en was grifformeerd predikant in Bossele (1689-1692), Goes (1692-1695) en Middelburg (1695-1735). Ie is één van de mist 'elezen stichtelijke auteurs in bevindelijk grifformeerde krieng 'eworren.
In um z'n gemeênte zat een vrouwe die aol z'n preken uutschreef. Zelf woe 't dat nie, mar aol tiejes z'n leven wiere d'r preken uut'egeve. Nae um z'n doôd wiere d'r vee meer uut'egeven. De bekende uutgaove was de 145 preken tellende serie Het gekrookte riet. Um was eên van de weinige predikanten die principieel de slaeven'andel ofwees, wat um nie geliefd mikte bie de koôplui van Middelburg.
Over um deeje verscheie volksverhaelen de ronde. De bekensten is het ok noe nog vertelde verhael over de engelenwacht. Op een aevond wier um op'ewacht bie de Heerengracht deu tweê mannen die um flienk an woue pakke. Toe a 't over de brugge kwam bleek um nie alleênig te wezene. Toe a de mannen da laeter vertellende bleek da Smietegeld wè allenig was. Dan moss't wê iengelen 'ewist ao...