Auguste François Charles (Guus) de Casembroot (Middelburg, 17 december 1906 - Utrecht, 10 feberwari 1965) was Commissaoris van de Konienginne van Zeêland tiejes de Twidde Wereldoorlog en de Waetersnoȏdramp van 1953. Z'n officiele naeme luujende: Jhr. Auguste François Charles de Casembroot.
Van 1932 toet 1948 was um mee een korte ongerbreking tiejes de leste oorlogsjaeren burgemeêster van Wasschappel. Vanof 1948 wier De Casembroot benoemd tot Commissaoris van de Konienginne van Zeêland.
De Casembroot bleef commissaoris toet z'n plotselinge doôd in 1965. In die zeventien jaer wier um een gerespecteerd en geliefd figure in Zeêland. Um was een dynaomisch persoôn die mee mensen uut aolle laegen van de bevolkienge makkelek contact maekende. Onvermoeibaar doorkruusende um de provincie om bie talloôze officiële helegenheden anwezig te wezene. Um wier in Zeêland beschouwd as "één van uus", mede deu z'n grôte kennisse van de provincie, het Zeêuws, de volksaerd en z'n vermôgen om mensen en naemen makkelek te onthouwene. Voorà gedurende de naeoôrlogse wederopbouwe en tiedens de Waetersnoȏdramp van 1953 dwong um deu z'n improvisaotietalent en grôte betrokkenheid vee respect of bie de Zeêuwen. Dat z'n populariteit nie was verhete bleek ant ende van 1999, toe De Casembroot 35 jaer nae z'n doôd bie een verkiezing georhaoniseerd deu de Provinciale Zeeuwse Courant het predicaot "Zeêuw van de Eêuwe" kreeg.