Idioma italiano

L'italiano ( u lingua italiana) ye una luenga romance. Ye a segunda mas amanada a o latín en termins de vocabulario dimpués d'o sardo. L'italiano ye una luenga oficial en Italia, Suiza, San Marino, a Ciudat d'o Vaticano, y Istria (en Eslovenia y Croacia). Tenió en o pasau estatus oficial en Albania, Malta y Monaco, a on encara ye prou estendillada, asinas como en as antigas colonias de Africa Oriental italiana y Africa Septentrional italiana a on encara chuga un papel important en bels sectors. L'italiano ye charrau por una gran comunidat d'expatriaus en America y minorías en atros puestos como Crimea, Francia (mas que mas en Corcega), Belchica, Montenegro y Tunisia. Muitos fablants nativos son bilingües, charrando tanto l'italiano estándard como beluna d'as otras luengas rechionals. A luenga italiana moderna se basa en o dialecto toscano de Florencia, Pisa y Siena debiu a que en iste dialecto s'escribió A Divina Comedia, a primera obra literaria escrita en "luenga moderna". O toscano ye a luenga en a que escribioron Dante Alighieri, Petrarca y Boccaccio, os tres grandes escritors d'o Renaiximiento italiano.